იურისტი ლევან ალაფიშვილი სოციალურ ქსელში ქართული ოცნების მიერ პოლიტიკური პარტიების აკრძალვისა და ოპოზიციონერი პოლიტიკოსებისთვის პოლიტიკური საქმიანობის აკრძალვა-შეზღუდვის ინიციატივას სოციალურ ქსელში ეხმაურება.

მისი თქმით, კონსტიტუცია, საკონსტიტუციო სასამართლოს გადაწყვეტილებით, პოლიტიკური პარტიის აკრძალვას მიიჩნევს დასაშვებად, "მოქალაქის გაწევრების უფლების ჩამორთმევას/აკრძალვას არ უშვებს".

"კონსტიტუცია პოლიტიკური პარტიის აკრძალვას მიიჩნევს დასაშვებად, საკონსტიტუციო სასამართლოს გადაწყვეტილებით.

კონსტიტუცია მოქალაქის გაწევრების უფლების ჩამორთმევას/აკრძალვას არ უშვებს.

მოქალაქეს კონკრეტულ შემთხვევაში ანდა კონკრეტული ქმედებისთვის შეიძლება შეეზღუდოს წევრობის/გაწევრების უფლება სასამართლოს კონტროლით.

გასააზრებლად და შესადარებლად, მაგალითები:

თავად კონსტიტუცია უკრძალავს სამხედრო მოსამსახურეებს (ყველას, ზოგადად) პარტიის წევრობას.

კონკრეტულ მოქალაქეს, კონკრეტული აკრძალული ქმედებისთვის შეიძლება სასამართლომ შეუზღუდოს თანამდებობის დაკავების ან საქმიანობის (პოლიტიკურისაც) უფლება გარკვეული ვადით.

საკონსტიტუციო სასამართლო, საერთო სასამართლო და კანონი ვერ დაადგენს პოლიტიკურ პარტიაში გაერთიანების/გაწევრების უფლების ზოგად და უვადო შეზღუდვას, ჩამორთმევას, ასე დაადგინა კონსტიტუციამ", ­— წერს ლევან ალაფიშვილი სოციალურ ქსელში.

ოცნების პრემიერმა, ირაკლი კობახიძემ პირველი არხის ეთერში განაცხადა, რომ პარტიების ჩამონათვალი, რომელთა აკრძალვაც საკონსტიტუციო სასამართლოს ძალით სურთ, მცირე პარტიების ჩათვლით, შეიძლება ათამდე იყოს.

ასაკრძალი პარტიების სიის შედგენის პრინციპი, მისი თქმით, ასეთია: პირველი — "პარტია შედგება იმ ადამიანებისგან, რომლებიც წარმოადგენდნენ სისხლიან რეჟიმს. აქ იგულისხმება "ნაცმოძრაობა", "ახალი" და რამდენიმე მცირე პარტია". მეორე კრიტერიუმია — "ვინც ამ სისხლიან პარტიასთან ერთად ჩართული იყო სახელმწიფოს წინააღმდეგ საბოტაჟში".

რაც შეეხება ოპოზიციური პოლიტიკოსების სიას, რომელთა აკრძალვასაც ქართული ოცნება აპირებს, კობახიძემ განაცხადა, რომ "სია რამდენიმე დღეში გახდება ცნობილი, როდესაც სარჩელი შევა ოფიციალურად საკონსტიტუციო სასამართლოში".