ქართულ ოცნებას ფინანსურ დანაშაულზე კანონპროექტში ცვლილება შეაქვს და ნასამართლები პირების ქვეყნიდან გასვლის წესს ცვლის.

3 სექტემბერს მიღებული ცვლილების მიხედვით, ფინანსურ და ეკონომიკურ დანაშაულებზე მსჯავრდებულ პირებს ქვეყნიდან გასვლა 16 წლით ეკრძალებოდათ. საკანონმდებლო პაკეტში ახალი ცვლილების მიხედვით, მსჯავრდებული მას შემდეგ შეძლებს ქვეყნის დატოვებას, რაც ზარალს სრულად აანაზღაურებს.

ხოლო მსჯავრდებულს, რომელსაც ზიანის ანაზღაურება ეკისრება, ვალდებულია ელექტრონული სამაჯური ატაროს. ოცნების მიერ მიღებული კანონპროექტის მიხედვით, მსჯავრდებულს საარსებო მინიმუმის ორმაგ ოდენობაზე მეტი თანხის ფლობა ეკრძალება ზარალის ანაზღაურებამდე. ხოლო ფინანსური დანაშაულის ჩამდენი პირისთვის ფულის ან ქონების გადაცემა ცალკე დანაშაულად ჩაითვლება და ჯარიმით ან ხუთ წლამდე პატიმრობით დაისჯება.

16 სექტემბერს, საპარლამენტო უმრავლესობის ლიდერმა, ირაკლი კირცხალიამ პარლამენტში გამართულ ბრიფინგზე განაცხადა, რომ "კორუფციის წინააღმდეგ ბრძოლის შესახებ" კანონს ამკაცრებენ. ცვლილებების თანახმად, საჯარო მოხელეები და პოლიტიკური თანამდებობის პირები, რომლებმაც სამოხელეო ან ფინანსური დანაშაულები ჩაიდინეს, ვალდებულები იქნებიან 30 წლის განმავლობაში ყოველწლიურად ქონებრივი დეკლარაცია შეავსონ.

ცნობისთვის, 4 სექტემბერს კანონმდებლობაში შეტანილი ცვლილებებით, ფინანსური დანაშაულების ჩამდენი პირებისგან ზარალის დაფარვის მიზნით ბრალდებულების ოჯახის წევრებისგან ქონების ამოღება გამარტივდა.

მოგვიანებით პარლამენტის იურიდიული კომიტეტის თავმჯდომარემ, არჩილ გორდულაძემ განაცხადა, რომ წარმოდგენილი ცვლილებები ბიძინა ივანიშვილთან სამართლებრივ დავაში მყოფ გიორგი ბაჩიაშვილზეც გავრცელდება.