მელ გიბსონის გახმაურებული ბლოკბასტერი ქრისტეს ვნებანი გამოსვლიდან 20 წელზე მეტი ხნის შემდეგ გრძელდება. გაგრძელება, სახელწოდებით ქრისტეს აღდგომა, ორ ნაწილად გამოვა და მას მაყურებელი 2027 წელს იხილავს. გადაღებები იტალიაში, ჩინეჩიტას კინოსტუდიაში, რამდენიმე დღის წინ დაიწყო. ახლახან გახდა ასევე ცნობილი, რომ ქრისტეს აღდგომაში ახალ მსახიობებს ვიხილავთ — ჩანაცვლდა ყველა მთავარი გმირის შემსრულებელი.

ფილმში იესო ქრისტეს ფინელი მსახიობი იააკო ოტონენი განასახიერებს. ოტონენს მაყურებლების უმრავლესობა ნეტფლიქსის სერიალიდან The Last Kingdom იცნობს. მან ასევე ითამაშა ვიკინგების სპინ-ოფში Vikings: Valhalla.

მარიამ ღვთისმშობელს, რომლის როლიც ქრისტეს ვნებანში რუმინელმა მაია მორგენშტერნმა შეასრულა, გიბსონის ახალ ფილმში პოლონელი მსახიობი კასია სმუტნიაკი ასრულებს, მარიამ მაგდალელს (ქრისტეს ვნებანში მონიკა ბელუჩი) კი — კუბელი მარიელა გარიგა.

რაც შეეხება სხვა მსახიობებს, პეტრეს იტალიელი პიერ ლუიჯი პაზინო განასახიერებს, პონტიუს პილატეს კი — ასევე იტალიელი რიკარდო სკამარჩო.

თავდაპირველად, გიბსონს ჩაფიქრებული ჰქონდა, რომ ქრისტეს აღდგომაში მისი წინამორბედის მსახიობები დაებრუნებინა. რადგან ფილმის გამოსვლიდან 20 წელზე მეტია გასული, რეჟისორი მსახიობების "გასაახალგაზრდავებლად" სხვადასხვა ტექნოლოგიის, მათ შორის, კომპიუტერული გრაფიკის გამოყენებასაც განიხილავდა. თუმცა, როგორც ახლა შემოქმედებით გუნდთან დაახლოებული წყარო ამბობს, ეს საშუალება მეტისმეტად ძვირადღირებულად ჩაითვალა და ახალი მსახიობების აყვანა გადაწყდა.

ჩინეჩიტას კინოსტუდია, რომელიც ევროპაში უდიდესია, ფილმის წინამორბედის მსგავსად, გადაღებების მთავარი ლოკაცია იქნება. თუმცა, ამასთან, გადაღებები დაგეგმილია სამხრეთ იტალიის ანტიკურ ქალაქებში, მათ შორის, მატერაში, ჯინოზაში, გრავინა-ლატერცასა და ალტამურაში.

რაც შეეხება შინაარსს: ქრისტეს აღდგომაში თხრობა კვლავ ბიბლიურ სიუჟეტს მიჰყვება, ამბავი კი, გიბსონის თქმით, "ანგელოზების დაცემიდან ქრისტეს უკანასკნელი მოციქულის სიკვდილამდე" იქნება მოთხრობილი. რეჟისორი ამატებს, რომ თავისი ჩანაფიქრი "საკმაოდ ამბიციურია" და ბოლომდე დარწმუნებულიც კი არაა, რომ მისი შესრულება გამოუვა.

• "სცენარში წარმოუდგენელი ამბები ხდება" — მელ გიბსონი ქრისტეს ვნებანის გაგრძელებაზე

ბიბლიურ ისტორიაზე დაფუძნებული ქრისტეს ვნებანი, რომელიც ეკრანებზე 2004 წელს გამოვიდა, გახდა ყველა დროის ყველაზე მაღალშემოსავლიანი დამოუკიდებელი კინოპროექტი; $30-მილიონიანი ბიუჯეტის საპირწონედ, ფილმის შემოსავალმა $612 მილიონს გადააჭარბა.

ქრისტეს ვნებანისთვის, რომელიც იესო ქრისტეს ცხოვრების ბოლო საათებზე გვიყვება, სცენარი მელ გიბსონმა და ბენედიქტ ფიცჯერალდმა დაწერეს. აღსანიშნავია, რომ ნაწარმოებში დიალოგები მხოლოდ არამეულ, ებრაულ და ლათინურ ენებზეა, რეჟისორი კი ფილმის სხვა ენებზე გახმოვანების წინააღმდეგი იყო.

უჩვეულო კომერციული წარმატებისა და ოსკარის სამ ნომინაციაში წარდგენის მიუხედავად, ფილმმა მაყურებელი ორად გახლიჩა. მსახიობების შესრულებამ და რეჟისორის ნამუშევარმა მოწონება კი დაიმსახურა, მაგრამ ნაწილმა ფილმი ძალადობის დაუფარავი სცენებისთვის გააკრიტიკა; ზოგმაც, შინაარსის გამო, მელ გიბსონი ანტისემიტიზმში დაადანაშაულა.

ქრისტეს აღდგომა, როგორც უკვე ვთქვით, ორ ნაწილად გამოვა. ფილმის პირველ ნაწილს მაყურებელი კათოლიკურ წითელ პარასკევს, 26 მარტს, იხილავს, მეორე ნაწილის პრემიერა კი ზუსტად 40 დღის შემდეგ, ამაღლების დღესასწაულზე, 6 მაისს შედგება.