ოცნების ხელისუფლების მთავრობის ადმინისტრაციის ცნობით, ირაკლი კობახიძემ ეუთოს თავმჯდომარე ელინა ვალტონენისთვან დაგეგმილი შეხვედრა გააუქმა.

"გუშინ, კანონსაწინააღმდეგო მიტინგში მონაწილეობისა და ცრუ განცხადებების გაკეთების გამო, პრემიერმინისტრმა ფინეთის საგარეო საქმეთა მინისტრთან დაგეგმილი შეხვედრა გააუქმა", ­ — ნათქვამია ოცნების ხელისუფლების მთავრობის ადმინისტრაციის განცხადებაში.

ცნობისათვის, გუშინ, 14 ოქტომბერს საქართველოში ვიზიტით მყოფი ეუთოს თავმჯდომარე, ფინეთის საგარეო საქმეთა მინისტრი ელინა ვალტონენი, დელეგაციის წევრებთან ერთად, პარლამენტთან შეკრებილ დემონსტრანტებს შეხვდა და მხარდაჭერა გამოუცხადა.

"მე ახლა თბილისში, პარლამენტის წინ ვარ, სადაც მშვიდობიანი დემონსტრანტები ნელ-ნელა იკრიბებიან. ბევრი ადამიანი მოდის ევროკავშირის, NATO-ს, როგორც ჩანს, ფინეთის და რაც მთავარია, საქართველოს დროშებით. მიზეზი არის ის, რომ ეს ხალხი შეშფოთებულია იმ გეზით, რომელიც ქვეყანამ აიღო; იმით, რომ ართმევენ საბაზისო უფლებებს, დაწყებული შეკრებისა და გამოხატვის თავისუფლებიდან. ეს ადამიანები იმსახურებენ ყველა ამ უფლების ქონას და ჩვენ ვართ აქ, რომ მათ მხარი დავუჭიროთ", — ამბობს ელინა ვალტონენი X-ზე გამოქვეყნებულ ვიდეოში.

ელინა ვალტონენი, 13-დან 15 ოქტომბრამდე აზერბაიჯანს, სომხეთსა და საქართველოს ეწვევა, რათა შეხვედრები გამართოს მაღალი დონის მთავრობის წარმომადგენლებთან, ასევე სამოქალაქო საზოგადოებისა და ანალიტიკური ცენტრების წარმომადგენლებთან.