აშშ-ის პრეზიდენტმა დონალდ ტრამპმა გამოაცხადა, რომ ჩინეთიდან იმპორტირებულ საქონელზე არსებულ 30%-იან ტარიფს 100%-იანს დაუმატებს — 1-ელი ნოემბრიდან ან უფრო ადრე. ამის შესახებ ინფორმაციას CNN ავრცელებს.

"ამერიკის შეერთებული შტატები ჩინეთზე დააწესებს 100%-იან ტარიფს, იმ ტარიფებზე დამატებით, რასაც ისინი ამჟამად იხდიან...ასევე 1-ელი ნოემბრიდან ჩვენ დავაწესებთ ექსპორტის კონტროლს ყველა კრიტიკულ პროგრამულ უზრუნველყოფაზე," — დაწერა 10 ოქტომბერს ტრამპმა Truth Social-ზე გამოქვეყნებულ პოსტში.

ტრამპის ეს განცხადება უკავშირდება პეკინის გადაწყვეტილებას, გაამკაცროს იშვიათი მეტალების ექსპორტის კონტროლი — ელემენტების, რომლებიც აუცილებელია მრავალი ელექტრონული მოწყობილობის წარმოებისთვის. შედეგად, ტრამპმა, როგორც ჩანს, გააუქმა შეხვედრა ჩინეთის პრეზიდენტ სი ძინპინთან, რომელიც ამ თვის ბოლოს სამხრეთ კორეაში უნდა გამართულიყო.