4 ოქტომბრის საქმეზე დაკავებულმა გიორგი ჩახუნაშვილმა ტვ პირველთან საუბრისას განაცხად, რომ აქციაზე აგრესია არავის მიმართ არ ჰქონია. ჩახუნაშვილის განცხადებით, აქციაზე პროფესიულ მოვალეობას ასრულებდა და აქციის მონაწილეებს სამედიცინო დახმარებას უწევდა.

"რადიოს, პრესას, ტელევიზიებს, კოლეგებს, ახლობლებს, მეგობრებს, ოჯახის წევრებს ყველას მადლობა. ყველას ვერ ჩამოვურეკე, იმიტომ რომ ჩემი ტელეფონი ჯერ დატუსაღებულია, თუმცა ყველას უდიდესი მადლობა. თურმე ამისთვის ღირს ცხოვრება. არაფერი არ დამთავრებულა ამით, გამოვედი მხნედ ვარ, გუშინ რომ აქცია იყო, ეს ვნახე. მედიკოსებმა გუშინ აჩვენეს თანაცხოვრება როგორ უნდა იყოს სხვადასხვა პოლიტიკური გემოვნების პირებს შორის.

შეიძლებოდა ჩემი პირდაპირ გაშვებაც. თავდებში იმდენი ხალხი იყო, რასაც მე გადავხედე, ეს იყო საშუალო სტანდარტი, რითაც გამოვიდა ჩემი გამოშვება.

მე უხეშობა მაგათთვის (პოლიციელები) არ შემიტყვია და მათ თვალებში ამოვიკითხე რომ მაგათთანაც შეიძლება თანაცხოვრება. აგრესია მაგათთან არ დამინახავს. რაც შემეხება მე, აგრესიული არასდროს არ ვყოფილვარ — არც ადრე, არც ახლა და არც ხვალ არ ვიქნები.

ის რასაც ამბობდნენ, არც ვმალავ მაგას, ვიდექი ქუჩაში, აქციებზე კიდევ ვიქნები და იქ მე ქუჩაში რასაც ვასრულებდი, აგრესია არავის მიმართ არ მქონია. ლაპარაკი რაზეც არის, იქ მე ვასრულებდი პროფესიულ მოვალეობას," — განაცხადა გიორგი ჩახუნაშვილმა ტვ პირველთან საუბრისას.

პედიატრ გიორგი ჩახუნაშვილს მოსამართლე ვალერიანი ბუგინაშილმა 20 000-ლარიანი გირაო შეუფარდა. პროკურატურამ სასამართლო სხდომაზე ჩახუნაშვილისთვის აღმკვეთი ღონისძიების სახით გირაოს შეფარდების შუამდგომლობა დააყენა, რაც სასამართლომ დააკმაყოფილა. მოქალაქეებმა ექიმს შეფარდებული გირაოს თანხა შეუგროვეს.

შეგახსენებთ, გიორგი ჩახუნაშვილი 9 ოქტომბრის ღამეს სამართალდამცავებმა სახლიდან აიყვანეს. 71 წლის ექიმს ბრალად ედებოდა ჯგუფურ ძალადობაში მონაწილეობა და სტრატეგიული ობიექტების ხელში ჩაგდების მცდელობა.