4 ოქტომბრის საქმეზე დაკავებულ გიორგი ჩახუნაშვილს მოსამართლე ვალერიანი ბუგინაშილმა 20 000-ლარიანი გირაო შეუფარდა. პროკურატურამ სასამართლო სხდომაზე ჩახუნაშვილისთვის აღმკვეთი ღონისძიების სახით გირაოს შეფარდების შუამდგომლობა დააყენა, რაც სასამართლომ დააკმაყოფილა. მოქალაქეებმა ექიმს შეფარდებული გირაოს თანხა შეუგროვეს.

"იმდენად სწრაფად ირიცხებოდა, რომ ძლივს მოვასწარი გაჩერება და ანგარიშის წაშლა.

საქართველოს ბანკიდან ან უცხოეთიდან (მარიამთან რიცხავენ) თუ ორშაბათს დაირიცხა დამატებითი თანხა, გადაერიცხება პოლიტიკური ტყვეებს.

დიდი მადლობა თანადგომისთვის! საქართველო გაიმარჯვებს!" — წერს ექიმი გიორგი ჩახუნაშვილის შვილი, კონსტანტინე ჩახუნაშვილი სოციალურ ქსელში.

შეგახსენებთ, გიორგი ჩახუნაშვილი 9 ოქტომბრის ღამეს სამართალდამცავებმა სახლიდან აიყვანეს. 71 წლის ექიმს ბრალად ედებოდა ჯგუფურ ძალადობაში მონაწილეობა და სტრატეგიული ობიექტების ხელში ჩაგდების მცდელობა.

სასამართლომ ჩახუნაშვილთან ერთად გიორგი მულაძის აღმკვეთ ღონისძიებაზეც იმსჯელა. 1985 წელს დაბადებულ მულაძეს, რომელიც პროფესიით გეოფიზიკოსია სასამართლომ პატიმრობა შეუფარდა. მულაძეს ჩახუნაშვილის მსგავსად ორი მუხლით ედავებოდნენ — ჯგუფურ ძალადობაში მონაწილეობა და სტრატეგიული ობიექტების ხელში ჩაგდების მცდელობა.