"ყოველ ჯერზე, როდესაც ის გამოჩნდება და ქართველი ხალხის და მისი არჩეული ხელისუფლების მიმართ რუსული ეპითეტებით ჟონგლიორობას დაიწყებს, მიიღებს საკმაოდ მკაფიო პასუხს ჩვენგან", — ამის შესახებ ოცნების პარლამენტის თავმჯდომარემ, შალვა პაპუაშვილმა ევროკომისიის პრესსპიკერის საგარეო და უსაფრთხოების საკითხებში, ანიტა ჰიპერის განცხადებაზე კომენტირებისას ბრიფინგზე თქვა. ცნობისათვის, ანიტა ჰიპერმა განაცხადა, რომ ქართული ოცნების ქმედებები "აშკარად რუსული პროპაგანდის სახელმძღვანელოდანაა" ინსპირირებული.

"პრესსპიკერმა ძალიან აიტაცა შედარება, თუ მითითებები რუსულ სახელმძღვანელოზე, სამსახურებზე და ა.შ. — აბსოლუტურად მდაბიო პროპაგანდაა, რასაც ის ეწევა. პროპაგანდას რომ ეწევა, გასაგებია, მაგრამ პროპაგანდასაც რაღაც თავისი სტილი ხომ უნდა ჰქონდეს. აბსოლუტურად მდაბიო პროპაგანდა ქართველის ხალხის მიმართა, რაღაც ეთნიკური ეპითეტების გამოყენებისა. ხან, "რუსული სახელმძღვანელო", ხან, რას ამბობს და ხან, რას ამბობს ეს ადამიანი. რა თქმა უნდა, ეს არის მიუღებელი. მე გუშინაც დავწერე და დღესაც მინდა ვთქვა, რომ ყოველ ჯერზე, როდესაც ის გამოჩნდება და ქართველი ხალხის და მისი არჩეული ხელისუფლების მიმართ რუსული ეპითეტებით ჟონგლიორობას დაიწყებს, მიიღებს საკმაოდ მკაფიო პასუხს ჩვენგან, ვინაიდან შეუძლებელი არის ასეთი მიდგომები ქართველმა ხალხმა მოითმინოს, როდესაც მას აბსოლუტურად არაფრად აგდებენ და ასე ზემოდან ყურებით გამოდის ერთი ბიუროკრატი, რომელმაც კარიერა ახლახანს დაიწყო, სავარაუდოდ იქ, გამოდის და თავს ესხმის ქართველ ხალხს და მის არჩეულ ხელისუფლებას“, — განაცხადა შალვა პაპუაშვილმა.