4 ოქტომბრის აქციის საქმეს ქართული ოცნების საგარეჯოს მუნიციპალიტეტის საკრებულოს ყოფილი თავმჯდომარის მოადგილე, მოსამართლე ლელა მარიდაშვილი განიხილავს.

სასამართლო პროცესზე პაატა ბურჭულაძის ადვოკატმა, შოთა თუთბერიძემ მოსამართლის აცილება მოითხოვა, რადგან მისი განმარტებით მოსამართლე მიკერძოებულია მისი პოლიტიკური წარსულიდან გამომდინარე და ვერ გამოიტანს სამართლიან განაჩენს.

"გვერდს ვერ ავუვლით იმას, რომ თქვენ მკაფიოდ გამოხატული პრეფერენციები გაქვთ იმ პარტიისადმი, რომელიც ასამართლებს ბრალდებულებს, თანაც ასამართლებს ისეთი ბრალდებით და იმ დანაშაულისთვის, რომელიც დადასტურების შემთხვევაშიც კი, დღეს რომ აღიარონ საქმე... ამ ადამიანებისთვის ციხეში ცალკე, პოლიტიკური ფლიგელია გამოყოფილი....

თქვენი წინსვლა, რომელიც გაგრძელდა სასამართლოში, მკაფიოდ უკავშირდება თქვენს პოლიტიკურ შეხედულებებს და ეჭვი მაქვს, რომ ამას უკავშირდება თქვენი სასამართლოში წამოსვლა. ყოველი ასეთი საქმე თქვენთვის იქნება "მტრის საქმე"... სამართლიანი სასამართლოს უფლების დარღვევაა იქნება ის, თუ ჩემი დაცვის ქვეშ მყოფს მისი პოლიტიკური მოწინააღმდეგე გაასამართლებს.... რომ ვიკითხოთ, ქართული ოცნების წევრი როცა ასამართლებს ოპოზიციური პარტიების წარმომადგენლებს, არის თუ არა ეს პრობლემა, ქართული ოცნების მხარდამჭერიც ვერ უარყოფს, რომ დიახ არის... თქვენ ამ საქმეში პოლიტიკურად ანგაჟირებული ხართ და სიმპათიები გაგაჩნიათ, თქვენ პირდაპირ პოლიტიკური პარტიის წარმომადგენელი ბრძანდებით, ქართული ოცნების წარმომადგენელი.. ბრალდებულები სამართლდებიან იმისთვის, რომ ქართული ოცნების მოწინააღმდეგეები არიან," — განაცხადა ადვოკატმა შოთა თუთბერიძემ (ტექსტი "რადიო თავისუფლების" ლაივ-ბლოგი).

"ახლა გაიგეთ?" — განაცხადა მოსამართლე მარიდაშვილმა და არ დააკმაყოფილა ადვოკატის შუამდგომლობა. მისი განცხადებით, "ოცნების“ წევრობა არ გულისხმობს მის არაობიექტურობას და დასძინა, რომ მისი მოსამართლედ დანიშვნა საკრებულოში მოღვაწეობას არ უკავშირდება.

"სოციალური სამართლიანობის ცენტრის" ინფორმაციით, ლელა მარიდაშვილი მოსამართლის თანამდებობაზე 2024 წლის 1 ოქტომბერს, 3 წლიანი გამოსაცდელი ვადით დაინიშნა. მარიდაშვილი 2017-2023 წლებში საგარეჯოს მუნიციპალიტეტის საკრებულოს თავმჯდომარის მოადგილის თანამდებობას იკავებდა. ლელა მარიდაშვილი ფიგურირებს სხვა სინდისის პატიმრების — საბა სხვიტარიძის, ანატოლი გიგაურის და გიორგი ახობაძის საქმეებში, ასევე აზერბაიჯანელი ჟურნალისტის, აფგან სადიგოვის საქმეშიც.

4 ოქტომბრის ეროვნული კრების საორგანიზაციო კომიტეტის წევრები პაატა ბურჭულაძე, ირაკლი ნადირაძე, მურთაზ ზოდელავა, ლაშა ბერიძე და პაატა მანჯგალაძე 4 ოქტომბრის ღამეს დააკავეს. მათ ბრალად ედებათ საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდება, ასევე ჯგუფური ძალადობის ორგანიზება, ხელმძღვანელობა და მასში მონაწილეობა.

უფრო კონკრეტულად, მურთაზ ზოდელავას, პაატა ბურჭულაძეს და ირაკლი ნადირაძეს 3 მუხლით წაუყენებს ბრალი: სტრატეგიული და განსაკუთრებული მნიშვნელობის ობიექტების ხელში ჩაგდება და ბლოკირების მცდელობის ჩადენილი ჯგუფურად; ჯგუფური ძალადობის ორგანიზება და ხელმძღვანელობა და მოწოდება საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ.

ლაშა ბერიძეს 2 მუხლით წაუყენებს ბრალი: სტრატეგიული და განსაკუთრებული მნიშვნელობის ობიექტების ხელში ჩაგდება და ბლოკირების მცდელობის ჩადენილი ჯგუფურად; ჯგუფური ძალადობის ორგანიზება და ხელმძღვანელობა.

პაატა მანჯგალაძეს ბრალდება ჯგუფური ძალადობის ორგანიზებისთვის წარედგინა.

აღნიშნული დანაშაულები 9 წლამდე პატიმრობას ითვალისწინებს.