ცესკოს თავმჯდომარემ, გიორგი კალანდარიშვილმა დღეს გამართულ ბრიფინგზე განაცხადა, რომ საარჩევნო ბიულეტენზე "გამოჟონვის კვალი შესაძლოა ნებისმიერ დროს იყოს", მაგრამ ეს არ იძლევა იმის იდენტიფიცირებას, თუ ვის მისცა ამომრჩეველმა ხმა. ის აცხადებს, რომ სწორედ ამიტომ ცესკომ, "როგორც პასუხისმგებლობიანმა ინსტიტუციამ მიიღო ზომები" და ხმის მთვლელ აპარატზე განთავსებული იქნება ქაღალდის სპეციალური საფარი, რომელიც უზრუნველყოფს იმას, რომ გამოჟონილი მარკერის კვალი არა იქნება იდენტიფიცირებული.

"ჩვენ როგორც პასუხისმგებლობიანმა ინსტიტუციამ ვნახეთ, რომ ზოგიერთმა დაინტერესებულმა პირმა ეს საკითხი სპეკულაციებისთვის გამოიყენა და მივიღეთ ზომები, ვენდორ კომპანიასთან ერთად, ხმის მთვლელ აპარატზე განთავსებული იქნება ქაღალდის სპეციალური საფარი, რომელიც უზრუნველყოფს იმას, რომ თუნდაც ჩარჩო-ფორმაში არასწორად მოთავსებული ბიულეტენის შემთხვევაში, ან მარკერის კვალის უკანა კვალის გამოჟონვის შემთხვევაში არ იყოს სივრცე, რომ თუნდაც ამ კვალის იდენტიფიცირება მოხდეს, რომელიც ხელს მისცემს დაინტერესებულ პირებს, რომ კვლავ ამ არჩევნებზეც ამ საკითხით სპეკულაცია მოახდინონ. ამიტომ მივიღეთ ზომები, რომ დავაზღვიოთ სპეკულაციები და არა ის, რომ ფარულობა ირღვეოდა და ამიტომ რაღაც დამატებითი მექანიზმები უზრუნველყავით.

…[გასულ არჩევნებზე] შეიძლება იყო გამოჟონვის კვალი, მაგრამ ეს არც ერთ შემთხვევაში არ ნიშნავს იმას, რომ ვინმეს ჰქონდა შესაძლებლობა, რომ იდენტიფიცირება მოეხდინა იმისა, თუ ვის მისცა ამომრჩეველმა ხმა.

[…] გამოჟონვის კვალი შესაძლოა ნებისმიერ დროს იყოს, იქიდან გამომდინარე, მათ შორის წელსაც.

გასულ წელსაც ჩვენ ვნახეთ, რომ არც ერთი შემთხვევა არ ყოფილა, სადაც ფარულობა დაირღვა და ეუთო/ოდირის დასკვნაშია არაფერი წერია ფარულობის დარღვევაზე, იქ წერია ალბათობაზე, კომპრომეტირებულ შემთხვევებზე, რომ შესაძლოა ყოფილიყო ალბათობა ფარულობის დარღვევასთან დაკავშირებითო და არცერთ შემთხვევაში იქ საუბარი არ არის მტკიცებით ფორმაში, რომ ფარულობა დაირღვა.

ბმა ამომრჩეველსა და ბიულეტენს შორის არცერთ ეტაპზე არ არის განსაზღვრული, რაც ნიშნავს, იმას რომ თუნდაც ჩარჩო-ფორმატი არ გამოვიყენოთ ან გამოჟონვის კვალი იყოს, ვერავინ ვერასდროს, ვერ დაადგენს იმას თუ რომელი ბიულეტენი რომელ ამომრთველს მიეკუთვნება, შეუძლებელია იმის იდენტიფიცირება თუ ვის მისცა ამომრჩეველმა ხმა. ეს არის ჩვენი ინსტიტუციის პასუხისმგებლობა, რომ ხმის ფარულობა უზრუნველყოფილი იყოს. ხმის ფარულობა იყო და არის დაცული", ­­­— განაცხადა ცესკოს თავმჯდომარემ, გიორგი კალანდარიშვილმა ბრიფინგზე.