სპეციალური პენიტენციური სამსახური დღევანდელ სასამართლო პროცესზე ზვიად რატიანის განცხადებას ეხმაურება. რატიანის განცხადებით, მესამე კვირაა, არც პაემანს უნიშნავენ, არც ბლოკნოტს აძლევენ და ვერც ციხის მაღაზიაში ყიდულობს კალამს. მისივე თქმით, ეს ყველაფერი "საეჭვოდ დაემთხვა ახალი დირექტორის დანიშვნა".

პენიტენციური სამსახური უარყოფს აღნიშნულს ფაქტს. მათი განმარტებით, ბრალდებულს ერთი თვის განმავლობაში ოთხი ხანმოკლე და ერთი ხანგრძლივი პაემნის უფლება ეძლევა, ხოლო სამსახურის განცხადებით, რატიანმა სექტემბერში სამი ხანმოკლე პაემნის უფლებით ისარგებლა, ერთი ხანმოკლე პაემანი კი, საკუთარი სურვილით სატელეფონო საუბარში გადაცვალა.

განცხადებაში ასევე ვკითხულობთ, რომ რატიანს მორიგი ხანმოკლე პაემანი 2025 წლის 3 ოქტომბერს აქვს ჩანიშნული. სპეციალური პენიტენციური სამსახური "ბრალდებულებს/მსჯავრდებულებს, ისე ნებისმიერ პირს" ცრუ ინფორმაციის გავრცელებისგან თავის შეკავებისკენ მოუწოდებს.

"საზოგადოების ინფორმირების მიზნით სპეციალური პენიტენციური სამსახური ეხმიანება ბრალდებულ ზვიად რატიანის მიერ სასამართლო პროცესზე გაკეთებულ განცხადებას – თითქოს მას დაწესებულებაში შეზღუდული აქვს პაემნით სარგებლობის უფლება. ბრალდებულ ზვიად რატიანის მიერ გავრცელებული ინფორმაცია არ შეესაბამება რეალობას, არის სიცრუე, რომელიც მიზნად ისახავს საზოგადოების სიცრუეში შეყვანას და სპეციალური პენიტენციური სამსახურის დისკრედიტაციას.

პენიტენციური კოდექსის შესაბამისად, ბრალდებულს უფლება აქვს, ერთი თვის განმავლობაში ჰქონდეს ოთხი ხანმოკლე პაემანი და პატიმრობაში (ბრალდებულის სტატუსით პენიტენციურ დაწესებულებაში ყოფნის პერიოდი რომლის, ვადაც არ აღემატება 9 თვეს) ყოფნის განმავლობაში — ერთი ხანგრძლივი პაემანი.

ბრალდებულმა ზვიად რატიანმა 2025 წლის სექტემბერში ისარგებლა სამი ხანმოკლე პაემნის უფლებით, ერთი ხანმოკლე პაემანი კი, საკუთარი სურვილით გადაცვალა სატელეფონო საუბარში.

ბრალდებულმა ზვიად რატიანმა 2025 წლის 29 სექტემბერს დაგეგმილი ხანგრძლივი პაემანი სპეციალური პენიტენციური სამსახურისთვის უცნობი მიზეზების გამო გააუქმა.

2025 წლის 2 ოქტომბერს ჩანიშნული ხანმოკლე პაემანი მისი განცხადების საფუძველზე, იმ მიზეზით, რომ ჰქონდა სასამართლო პროცესი, გადატანილ იქნა 2025 წლის 13 ოქტომბერს.

ასევე, აღსანიშნავია, რომ ბრალდებულ ზვიად რატიანს მორიგი ხანმოკლე პაემანი ჩანიშნული აქვს 2025 წლის 3 ოქტომბერს.

ბრალდებულის თანხმობის შემთხვევაში, სპეციალური პენიტენციური სამსახური უზრუნველყოფს 2025 წლის სექტემბერში ბრალდებულ ზვიად რატიანთან შეხვედრაზე მყოფი ვიზიტორების შესახებ ინფორმაციის გამოქვეყნებას.

სპეციალური პენიტენციური სამსახური კიდევ ერთხელ მოუწოდებს როგორც ბრალდებულებს/მსჯავრდებულებს, ისე ნებისმიერ პირს, თავი შეიკავონ მსგავსი სახის ცრუ ინფორმაციის გავრცელებისგან.

დამატებით ვაქვეყნებთ, ბრალდებულ ზვიად რატინის 2025 წლის 29 სექტემბრის განცხადებას, 2025 წლის 2 ოქტომბერს ჩანიშნული ხანმოკლე პაემნის 2025 წლის 13 ოქტომბერს გადატანასთან დაკავშირებით," — ვკითხულობთ უწყების განცხადებაში.

შეგახსენებთ, პოეტი ზვიად რატიანი პარლამენტთან მიმდინარე აქციაზე 23 ივნის სისხლის სამართლის კოდექსის 353 პრიმა მუხლის საფუძველზე დააკავეს, რაც პოლიციელზე თავდასხმას გულისხმობს. ამ მუხლის პირველი ნაწილი 4-დან 7 წლამდე თავისუფლების აღკვეთას ითვალისწინებს. მოსამართლე გიორგი გელაშვილის თქმით, ზვიად რატიანის საქმეზე განაჩენი 9 ოქტომბერს, 17:00 საათზე ჩანიშნულ სხდომაზე გამოცხადდება.