ზვიად რატიანმა დღეს გამართულ სასამართლო სხდომაზე თქვა, რომ მისი უფლებები იზღუდება მესამე კვირაა, არც პაემანს უნიშნავენ, არც ბლოკნოტს აძლევენ და ის ვერც ციხის მაღაზიაში ყიდულობს კალამს. მისივე თქმით, ეს ყველაფერი "საეჭვოდ დაემთხვა ახალი დირექტორის დანიშვნა".

ზვიად რატიანის ადვოკატმა, მარიამ პატარიძემ დასკვნითი სიტყვაში თქვა, რომ "პოეტის ქმედება იყო სპონტანური სიმბოლური ჟესტი და ზვიად რატიანს დანაშაული არ ჩაუდენია".

"პოეტის ქმედება იყო სპონტანური სიმბოლური ჟესტი და მიუხედავად იმისა, რა ინტერპრეტაცია ექნება ზვიად რატიანის გაწნულ სილას პოლიციელისთვის, ან ვინმეს მიერ დამუნათებას იმსახურებს თუ არა სიმბოლური აქტი, ან რა ეტიმოლოგიური განმარტება შესაძლოა ჰქონდეს სილის გაწვნას — ამით არც ქმედების ინტენსივობა არ იცვლება და ქმედების მოტივაცია, რაც სისხლის სამართლის კოდექსის ენაზე იმას ნიშნავს, რომ ზვიად რატიანს დანაშაული არ ჩაუდენია. ზვიად რატიანის ქმედება შესაძლოა იყო არაპოეტურიც — მაგრამ ამავდროულად არადანაშაულებრივი", — თქვა პატიმრობაში მყოფი პოეტის, ზვიად რატიანის ადვოკატმა, მარიამ პატარიძემ დასკვნითი სიტყვაში (ტექსტი "რადიო თავისუფლების" ლაივ-ბლოგიდან).

მოსამართლე გიორგი გელაშვილის თქმით, ზვიად რატიანის საქმეზე განაჩენი 9 ოქტომბერს, 17:00 საათზე ჩანიშნულ სხდომაზე გამოცხადდება.

9 ოქტომბრის სხდომაზე ზვიად რატიანიც სასამართლოზე საბოლოო სიტყვის უფლებით ისარგებლებს.

პოეტი ზვიად რატიანი პარლამენტთან მიმდინარე აქციაზე 23 ივნის სისხლის სამართლის კოდექსის 353 პრიმა მუხლის საფუძველზე დააკავეს, რაც პოლიციელზე თავდასხმას გულისხმობს. ამ მუხლის პირველი ნაწილი 4-დან 7 წლამდე თავისუფლების აღკვეთას ითვალისწინებს.