ლეგენდარული ამერიკელი მსახიობი, ჯულია რობერტსი რომელიც სულ მალე თავის 50-ე დაბადების დღეს აღნიშნავს, ერთ-ერთი ყველაზე პოპულარული ჟურნალის Harpers Bazaar-ის ნოემბრის თვის ყდაზე მოხვდა.

ამერიკელების საყვარელმა მსახიობმა იტერვიუში გარდა იმისა, რომ ახალი ფილმი Wonder დააანონსა, მკითხველს საკუთარ კარიერასა და ახალგაზრდობის წლებზეც ესაუბრა.

ინტერვიუს სრული ვერსიას ჟურნალის მკითხველი ნოემბერში იხილავს, თუმცა რამდენიმე ამონარიდი უკვე ხელმისაწვდომია.

მაგალითად, დღეს მსოფლიოს მთავარი გამოცემები, რომლებიც კინოსა და შოუ-ბიზნესზე წერენ, მთავარ ციტატად ჯულიას იმ ფრაზას იყენებენ, სადაც მსახიობი ამბობს:

"ჩემთვის პრიორიტეტს მხოლოდ საკუთარი თავი წარმოადგენდა, ძალიან ეგოისტი ვიყავი"

მსახიობი ასევე იხსენებს, რომ მასზე ყველაზე დიდი გავლენა მეუღლემ, დენი მოდერმა მოახდინა, რომელთან ერთადაც უკვე 15 წელია ცხოვრობს და სამი შვილი ჰყავთ.

"საკუთარი თავის პოვნაში დენისთან შეხვედრა დამეხმარა, როდესაც ამაზე ვფიქრობ, ვხვდები რომ სწორედ ის [დენი] აძლევს ჩემს ცხოვრებას ასეთი დიდ მნიშვნელობას და დიახ, სწორედ ის არის მიზეზი, რის გამოც ბედნიერი ვარ", - ყველა ოსკარის მფლობელი მსახიობი.

ამავდროულად ამერიკელების ყველაზე საყვარელმა მსახიობმა ინტერვიუში დენი მოდერთან ერთად მუშაობის პროცესზეც ისაუბრა. დენი ოპერატორია, რომელიც ჯულიასთან ერთად მუშაობდა ფილმებზე - The Mexican, The Normal Heart და Secret in Their Eyes.

"ასე ვიტყოდი, მასთან ერთად მუშაობაში არის დიდი კომფორტიც და ტერორიც, ეს შესანიშნავი კომბინაციაა. ტერორია იმიტომ რომ, ადამიანი, რომელზეც შთაბეჭდილების მოხდენა ყველაზე მეტად მსურს, პირდაპირ მე მიყურებს", - ამბობს რობერტსი,

რაც შეეხება კარიერას, რობერტსმა ისაუბრა, რომ ახლა მისთვის ყველაზე დიდი პრიორიტეტი ოჯახია, სწორედ ამიტომ ნაცვლად იმისა, რომ როლები და ახალი პროექტები ეძებოს, უბრალოდ ზის და ელოდება რას შესთავაზებენ, ეს კი მისთვის გარკვეულ აზარტთანაც ასოცირდება.

"იმის მაგივრად რომ ახალი პროექტები ვეძებო, მე უბრალოდ ველოდები რა გამოჩნდება, ეს პროცესს უფრო სახალისოს და ბუნებრივს ხდის. ყოველ ახალ სცენარს მაღალ სტანდარტებს ვუწესებ, რადგან თუ დავთანხმდები ეს ყველაფერი [ოჯახი] უნდა მივატოვო", - ამბობს მსახიობი.

რაც შეეხება მის სამომავლო გეგმებს, გარდა იმისა რომ 2017 წლის ნოემბერში მისი მონაწილეობით რ. ჯ. პალაციოს საოცრების ეკრანიზაცია გამოვა, HBO-მ ოფიციალურად დაადასტურა, რომ არხი ახალი სერიალის, დღეს ყველაფერი შეიცვლებას, გადაღებებს დაიწყებს, რომელშიც მთავარ როლს ჯულია შეასრულებს.

გარდა ამისა, ცოტა ხნის წინ გავრცელდა ინფორმაცია, რომ ჯულია რობერტსის მონაწილეობით კიდევ ერთი სერიალი გამოვა, რომელსაც Mr. Robot-ის შემქმნელი გადაიღებს.

რაც შეეხება კინოს, 49 წლის მსახიობს აქაც დიდი გეგმები აქვს, მსახიობის სამომავლო პროექტების ჩამონათვალში ხუთი ფილმია, მათ შორის მნიშვნელოვანი წვრილმანები, სადაც ვაიოლა დევისთან ერთად ითამაშებს.