ევროსაბჭოს დელეგაცია 24 და 25 სექტემბერს საქართველოში ფაქტების დამდგენი ვიზიტით ჩამოვა. ამის შესახებ ინფორმაციას ევროსაბჭო ოფიციალურ ვებგვერდზე ავრცელებს.

ვიზიტის ფარგლებში საქართველოში, კონგრესის სამდივნოს თანხლებით, ადგილობრივი ხელისუფლების პალატის პრეზიდენტი, ბერნდ ფიორინგერი და კონგრესის თემატური მომხსენებლელი ადგილობრივი და რეგიონული არჩევნების მონიტორინგის საკითხებში, სტიუარტ დიქსონი ჩამოვლენ.

გავრცელებული ინფორმაციით, ვიზიტის მიზანია არსებული პოლიტიკური სიტუაციის გავლენის შეფასება ადგილობრივ ხელისუფლებებზე, განსაკუთრებით კი მოსალოდნელ ადგილობრივ არჩევნებზე, რომლებიც საქართველოში 2025 წლის 4 ოქტომბერს გაიმართება.

"ადგილობრივი და რეგიონული ხელისუფლების კონგრესის დელეგაცია, რომელიც შედგება ადგილობრივი ხელისუფლების პალატის პრეზიდენტის, ბერნდ ფიორინგერის (გერმანია, EPP/CCE), კონგრესის თემატური მომხსენებლის ადგილობრივი და რეგიონული არჩევნების მონიტორინგის საკითხებში, სტიუარტ დიქსონის (გაერთიანებული სამეფო, ILDG) მონაწილეობით კონგრესის სამდივნოს თანმხლებით, საქართველოში ფაქტების დასადგენი ვიზიტით ჩამოვა," — წერია გავრცელებულ განცხადებაში.

დელეგაცია ცენტრალური საარჩევნო კომისიის თავმჯდომარეს, სახალხო დამცველის პირველ მოადგილესა და პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველ მოადგილეს შეხვდება. ასევე შეხვედრა გაიმართება კონგრესში საქართველოს ეროვნულ დელეგაციასთან და საქართველოს ადგილობრივი თვითმმართველობების ეროვნული ასოციაციის წარმომადგენლებთან.

"დელეგაცია შეხვდება საქართველოს ხელისუფლებისა და ადგილობრივი თვითმმართველობის წარმომადგენლებს. ასევე დაგეგმილია შეხვედრები მედიის, არასამთავრობო ორგანიზაციებისა და პოლიტიკური პარტიების წარმომადგენლებთან", — წერია ევროსაბჭოს განცხადებაში.

განცხადებაში ასევე აღნიშნულია, რომ ეს ვიზიტი არც პოლიტიკური მხარდაჭერის და არც შეხვედრილ მხარეთა ლეგიტიმურობის დასტურია.

"არ უნდა ჩაითვალოს პოლიტიკურ მხარდაჭერად არც დელეგაციის მიერ შეხვედრილ მხარეთა ლეგიტიმურობისთვის და არც მათ მიერ გამოთქმული მოსაზრებების მიმართ", — წერია განცხადებაში