"დაკავებას უკავშირებს იმ შიშს, რომელიც მისმა განცხადებებმა წარმოშვა ქართული ოცნების წრეებში," — ამის შესახებ ოპოზიციონერმა პოლიტიკოსმა ბორის ჩელე ყურუამ ერთიანი ნაციონალური მოძრაობის დაპატიმრებული ლიდერის, ლევან ხაბეიშვილის სუს-ის წინასწარი დაკავების იზოლატორში მონახულების შემდეგ განაცხადა.

როგორც მან აღნიშნა, ლევან ხაბეიშვილის დაკავება ემსახურება იმას, რომ "ქართულმა ოცნებამ საკუთარი პოლიტიკური ოპონენტი ციხეში გამოკეტოს, რასაც შეიძლება იმისგან განსხვავებული ეფექტი ჰქონდეს, რაც უნდათ"

ბორის ჩელე ყურუას თქმით, კონკრეტულ გეგმას და შემდეგ ნაბიჯებს ხაბეიშვილი თანდათან თვითონ განაცხადებს.

"კარგად არის, მხნედ არის, ამაში ეჭვი არავის ეპარებოდა, რომ დაკავებით ამ ქვეყანაში პოლიტიკოსს მხნეობას ვერ გაუქრობ, რაც შეეხება გზავნილს, გზავნილი აქვს მარტივი — "რატომ დამაკავეს თუ არ ეშინოდათ?!". თავის დაკავებას უკავშირებს იმ შიშს, რომელიც მისმა განცხადებებმა წარმოშვა ქართული ოცნების წრეებში, რომ ამ ადამიანებს ერთმანეთთანაც მოუწიათ იმის აღიარება, რომ ეშინიათ, შესაბამისად, მე გონია, რომ სკეპტიკურად განწყობილ ადამიანებსაც რაღაც შეკითხვებს უჩენს — რატომ შეიძლება დააკავო პოლიტიკოსი დაპირებისთვის, ეს ხომ აბსურდია და არანაირ სამართლებრივ მიზნებს ეს არ ემსახურება. ეს კიდევ და კიდევ ემსახურება იმას, რომ ქართულმა ოცნებამ საკუთარი პოლიტიკური ოპონენტი ციხეში გამოკეტოს, რასაც შეიძლება იმისგან განსხვავებული ეფექტი ჰქონდეს, რაც უნდა ქართულ ოცნებას.

ზოგადად კანონის ბრუტალურად განმარტვა ყოველთვის არ გვაძლევს, რაც კანონმდებლობას უნდა რომ ამ განმარტებამ მოგვცეს ამ შემთხვევაში პოლიტიკოსის დაკავება იმისთვის, რომ ის ჰპირდება რაღაცას მოსახლეობას. არ შეიძლება დანაშაულად იქნას აღქმული და არცერთ კანონმდებლობას ამის დანაშაულად გამოცხადება არ უნდოდა. ეს თუ დანაშაულია გადახედონ საკუთარ დაპირებებს კონკრეტულ თანხებს, რომელსაც ჰპირდებოდნენ ხან სოფლებს, ხან საჯარო მოსამსახურეებს ან ხელფასის მომატების დაპირება და ა.შ. საბოლოო ჯამში არ შეიძლება, რომ ეს აღქმული იყოს ქრთამის დაპირებად, ეს უფრო არის პოლიტიკოსის დაპირება და ამაშიც არ უნდა შევყვეთ ამ მსჯელობაში, ეს ხომ ყველაფერი არ არის, ეს ხომ კონკრეტული სისხლის სამართლის საქმე არ არის იურისპუდენიციაზე და არ არის მტკიცებულებები და არგუმენტაცია, ეს არის პოლიტიკური ოპონენტის ციხეში გამოკეტვა.


4 ოქტომბერი ის თარიღია და მისი განცხადებები, რის გამოც ის თვლის, რომ ციხეშია, რის გამოც ის თვლის, რომ შეეშინდა ბიძინა ივანიშვილს და შეეშინდა ქართულ ოცნებას. მე გამხმოვანებელი ვერ ვიქნები, კონკრეტულ გეგმას და შემდეგ ნაბიჯებს მე რასაც მივხვდი საუბრიდან, თანდათან თვითონ განაცხადებს. ვიცით ციხეში ადამიანს, რომ პირს ვერ აუკრავენ, მართალია, რომ გადაადგილებას შეუზღუდავენ ტელევიზიაში ვერ მივა, მაგრამ მაინც მას გამოხატვის თავისუფლებას მაინც იმ დონეზე ვერ შეუზღუდავენ, რომ ვერაფერი ვერ თქვას. ასე რომ მე როგორც ვიცი, ის აპირებს კიდევ განცხადების გაკეთებას," — განაცხადა ბორის ჩელე ყურუამ.

ენმ-ის ლიდერი ლევან ხაბეიშვილი ტელეკომპანია "ფორმულას" შენობასთან დააკავეს. სუს-ის წარმომადგენელმა ბრიფინგზე თქვა, რომ ხაბეიშვილი "ტელევიზიასა და სოციალურ ქსელებში ავრცელებდა მოწოდებებს და ძალოვანი სისტემის თანამშრომლებს ჰპირდებოდა ქრთამის მიცემას იმ შემთხვევაში, თუ ხელისუფლების წინააღმდეგ გამართულ აქციებზე, შსს-ს განსაკუთრებულ დავალებათა დეპარტამენტის თანამშრომლები უარს იტყოდნენ მათზე დაკისრებული მოვალეობების შესრულებაზე".

დაკავებულია კოალიცია ცვლილებისთვის წევრი მურთაზ ზოდელავაც, რომელიც ლევან ხაბეიშვილის დაკავების დროს ადგილზე იყო. სუს-ში გამართულ ბრიფინგზე ითქვა, რომ "ლევან ხაბეიშვილმა დაკავებისთანავე მიაწოდა თავისი მობილური ტელეფონი ზოდელავას, მან კი აღნიშნული ტელეფონის გადამალვის მიზნით, სცადა გაქცევა".