სუს-მა ენმ-ის ლიდერი ლევან ხაბეიშვილი საჯარო მოხელისთვის ქრთამის შეთავაზების ბრალდებით დააკავა. უწყება ხაბეიშვილს ერთ-ერთი ტელეკომპანიის ეთერში გაკეთებული განცხადების გამო ედავება, სადაც ოპოზიციური ლიდერი სამართალდამცავებს მმართველი პარტიის მითითებების არ შესრულებისკენ მოუწოდებს და სანაცვლოდ 200 000 დოლარს ჰპირდება.

"აღნიშნული ეხება ქრთამის სახით მოხელეებისთვის ფულადი თანხის საჯარო დაპირების ფაქტს. კერძოდ, ერთ-ერთი პოლიტიკური პარტიის წარმომადგენელი ლევან ხაბეიშვილი საჯარო სივრცეში ტელევიზიასა და სოციალურ ქსელებში ავრცელებდა მოწოდებებს და ძალოვანი სისტემის თანამშრომლებს ის ჰპირდებოდა ქრთამის მიცემას იმ შემთხვევაში თუ ხელისუფლების წინააღმდეგ გამართულ აქციებზე შსს-ს განსაკუთრებულ დავალებათა დეპარტამენტის თანამშრომელი უარს იტყოდნენ მათზე დაკისრებული მოვალეობების შესრულებაზე. ასევე თუ არ გამოიყენებდნენ მათ ხელთ არსებულ კანონით ნებადართულ სპეციალურ საშუალებებს. ვინც ასეთ ქმედებას განახორციელებდა ლევან ხაბეიშვილი საჯაროდ ჰპირდებოდა 200 000 აშშ დოლარის გადახდას.

გარდა ამისა, ლევან ხაბეიშვილი 200 000 ათასი დოლარის ქრთამის სახით გადახდას საჯაროდ დაჰპირდა პოლიციის იმ თანამშრომლებსაც, რომლებიც მიაწვდიდნენ სამსახურებრივი საქმიანობასთან დაკავშირებულ სხვადასხვა სახის ინფორმაციას და საიდუმლო მასალას. იგი ქრთამის სახით დაჰპირდა განსაკუთრებული დავალებათა დეპარტამენტის თანამშრომლებს წვრთნასა და ვარჯიშზე უარის თქმით სანაცვლოდაც," — განაცხადა უწყებამ.

უწყებამ ასევე დასძინა, რომ ხაბეიშვილი ამ განცხადებებს სისტემატურად ავრცელებდა და ამბობდა, რომ "ნებისმიერი მეთოდი უნდა იყოს გამოყენებული ხელისუფლების შესაცვლელად". ოპოზიციონერ ლიდერს სისხლის სამართლის კოდექსის 339-ე მუხლის მეორე ნაწილით ედავებიან, რაც 4-დან 7 წლამდე პატიმრობას ითვალისწინებს.