გუშინ, 11 სექტემბერს დაკავებული ერთიანი ნაციონალური მოძრაობის პოლიტსაბჭოს თავმჯდომარე ლევან ხაბეიშვილთან და კოალიცია ცვლილებისთვის წევრ მურთაზ ზოდელავასთან ადვოკატები ამ დრომდე არ შესულან.

ამჟამად დაკავებულების ადვოკატები სახელმწიფო უსაფრთხოების სამსახურთან იმყოფებიან და მათი დაცვის ქვეშ მყოფებთან შესვლას ელოდებიან.

მანამდე, ლევან იოსელიანმა სუს-ს მოუწოდა, რომ უზრუნველყო ბრალდებულებთან მათი ინტერესების დამცველი ადვოკატების შეშვება.

მისი თქმით, დაცვის უფლება გარანტირებულია საქართველოს კანონმდებლობით და საგამოძიებო უწყებები ვალდებულნი არიან არ შეუშალონ ხელი ამ უფლების ეფექტიანად განხორციელებას.

"საქართველოს სახალხო დამცველისთვის ადვოკატის საჯარო მომართვიდან ცნობილი გახდა, რომ რამდენიმე საათის განმავლობაში ადვოკატებს არ ეძლევათ ლევან ხაბეიშვილთან და მურთაზ ზოდელავასთან შეხვედრის შესაძლებლობა.

დაცვის უფლება გარანტირებულია საქართველოს კანონმდებლობით და საგამოძიებო უწყებები ვალდებულნი არიან არ შეუშალონ ხელი ამ უფლების ეფექტიანად განხორციელებას.

მოვუწოდებთ სახელმწიფო უსაფრთხოების სამსახურს დაუყოვნებლივ უზრუნველყოს ბრალდებულებთან მათი ინტერესების დამცველი ადვოკატების შეშვება," — ნათქვამია სახალხო დამცველის განცხადებაში.

ენმ-ის ლიდერი ლევან ხაბეიშვილი ტელეკომპანია "ფორმულას შენობასთან დააკავეს. სუს-ის წარმომადგენელმა ბრიფინგზე თქვა, რომ ხაბეიშვილი "ტელევიზიასა და სოციალურ ქსელებში ავრცელებდა მოწოდებებს და ძალოვანი სისტემის თანამშრომლებს ჰპირდებოდა ქრთამის მიცემას იმ შემთხვევაში, თუ ხელისუფლების წინააღმდეგ გამართულ აქციებზე, შსს-ს განსაკუთრებულ დავალებათა დეპარტამენტის თანამშრომლები უარს იტყოდნენ მათზე დაკისრებული მოვალეობების შესრულებაზე".

დაკავებულია კოალიცია ცვლილებისთვის წევრი მურთაზ ზოდელავაც, რომელიც ლევან ხაბეიშვილის დაკავების დროს ადგილზე იყო. სუს-ში გამართულ ბრიფინგზე ითქვა, რომ "ლევან ხაბეიშვილმა დაკავებისთანავე მიაწოდა თავისი მობილური ტელეფონი ზოდელავას, მან კი აღნიშნული ტელეფონის გადამალვის მიზნით, სცადა გაქცევა".