რუსეთ-ბელარუსის ერთობლივი სამხედრო წვრთნების დაწყებამდე, პოლონეთსა და ბელარუსს შორის, 12 სექტემბრის ღამეს, ყველა სასაზღვრო გადაკვეთის პუნქტი დაიხურა. ამის შესახებ ინფორმაციას უკრაინული მედია ავრცელებს.

საზღვრის გადაკვეთა შეჩერებულია ორივე მიმართულებით, მათ შორის ავტომობილებისა და სატვირთო მატარებლებისთვისაც.

"ზაპად-2025" ("ზაპად" რუსულად "დასავლეთს" ნიშნავს) წვრთნები 12 სექტემბერს ბელარუსსა და რუსეთის დასავლეთ მხარეს იწყება და მათმა დაწყებამ NATO-ს აღმოსავლეთის წევრი ქვეყნების, მათ შორის პოლონეთის, ლიტვისა და ლატვიის შეშფოთება გამოიწვია.

ვარშავამ განაცხადა, რომ წვრთნების დაწყების პარალელურად, ბელარუსთან და რუსეთის კალინინგრადის ექსკლავთან საზღვრებზე 40 000 ჯარისკაცს განალაგებს.

პოლონეთმა ბელარუსთან სასაზღვრო გადაკვეთის პუნქტების უმეტესობა მანამდე დახურა, ამ დრომდე მხოლოდ ორი მუშაობდა.

გვიან ღამით გამართულ ბრიფინგზე, რომელიც ბელარუსის საზღვართან გაიმართა, პოლონეთის შინაგან საქმეთა მინისტრმა მარცინ კერკინსკიმ განაცხადა, რომ წვრთნები პირდაპირ არის მიმართული პოლონეთისა და ევროკავშირის წინააღმდეგ. მან ასევე გაიხსენა რუსული დრონების მიერ პოლონეთის საჰაერო სივრცეში შეჭრა.

დასავლელი ოფიციალური პირების თქმით, წვრთნები, რომლებიც თავდაცვით ღონისძიებად არის წარმოდგენილი, წლების განმავლობაში ამძაფრებდა მინსკისა და მისი მეზობლების ურთიერთობებს. "ზაპადის" წვრთნები, რომლებიც ოთხ წელიწადში ერთხელ ტარდება, ევროპაში უკვე ათწლეულზე მეტია განსაკუთრებული ყურადღების ქვეშაა.

ცნობისთვის, პოლონეთის არმიის ოპერატიული სარდლობის განცხადებით, 12 სექტემბერს, რუსეთის მიერ უკრაინაზე განხორციელებული თავდასხმის შედეგად, რუსეთმა პოლონეთის საჰაერო სივრცე უპრეცედენტოდ დაარღვია. სარდლობის მიერ გავრცელებულ განცხადებაში აღნიშნულია, რომ რამდენიმე საფრთხის შემცველი დრონი ჩამოაგდეს.