პოლონეთის არმიის ოპერატიული სარდლობის განცხადებით, რუსეთის მიერ უკრაინაზე განხორციელებული თავდასხმის შედეგად, რუსეთმა პოლონეთის საჰაერო სივრცე უპრეცედენტოდ დაარღვია. სარდლობის მიერ გავრცელებულ განცხადებაში აღნიშნულია, რომ რამდენიმე საფრთხის შემცველი დრონი ჩამოაგდეს. ბოლო ინფორმაციით, პოლონეთმა მათ საჰაერო სივრცეში შესული 19 დრონიდან 4 ჩამოაგდო.

"დღეს, რუსეთის ფედერაციის მიერ უკრაინის ტერიტორიაზე განხორციელებული თავდასხმის შედეგად, დრონის ტიპის ობიექტებით პოლონეთის საჰაერო სივრცე უპრეცედენტოდ დაირღვა. ეს არის აგრესიის აქტი, რომელმაც რეალური საფრთხე შეუქმნა ჩვენი მოქალაქეების უსაფრთხოებას.

საჰაერო ძალების ოპერატიული სარდლის ბრძანებით დაუყოვნებლივ ამოქმედდა თავდაცვის პროცედურები.

პოლონურმა და მოკავშირე ძალებმა რადარებით რამდენიმე ობიექტი დააფიქსირეს, ხოლო ის ობიექტები, რომლებიც საფრთხეს წარმოადგენდნენ, ოპერატიულად სარდლის გადაწყვეტილებით განეიტრალდა. ნაწილი დრონებისა, რომლებიც ჩვენს საჰაერო სივრცეში შეიჭრნენ, ჩამოგდებულია. ამჟამად გრძელდება მათი შესაძლო ვარდნის ადგილების მოძიება და ლოკალიზაცია.

საჰაერო ძალების ოპერატიული სარდლობა ყურადღებით აკვირდება ვითარებას, ხოლო პოლონეთისა და მოკავშირე ქვეყნების ძალები და რესურსები სრულ მზადყოფნაში რჩებიან შემდგომი მოქმედებებისთვის", — წერია გავრცელებულ განცხადებაში.

პოლონეთის პრემიერმინისტრმა, დონალდ ტუსკმა NATO-ს გენერალურ მდივანს მომხდართან დაკავშირებით ინფორმაცია უკვე მიაწოდა. ამის შესახებ მან X-ზე დაწერა.

"მე NATO-ს გენერალურ მდივანს მივაწოდე ინფორმაცია მიმდინარე მდგომარეობისა და იმ ქმედებების შესახებ, რომლებიც მივიღეთ ჩვენი საჰაერო სივრცის დამრღვევ ობიექტებთან მიმართებით. ჩვენ მუდმივ კავშირში ვართ", — დაწერა ტუსკმა.

მოგვიანებით, NATO-ს პრესსპიკერმა, ალისონ ჰარტმა სოციალურ ქსელში დაწერა, რომ NATO პოლონეთის ხელმძღვანელობასთან აქტიურ კონტაქტშია.

"ღამით პოლონეთის საჰაერო სივრცეში უამრავი დრონი შევიდა, რომლებსაც პოლონეთისა და NATO-ს საჰაერო თავდაცვა შეხვდა. NATO-ს გენერალური მდივანი კონტაქტზეა პოლონეთის ხელმძღვანელობასთან და NATO მჭიდრო კონსულტაციებს აწარმოებს პოლონეთთან", — დაწერა ალისონ ჰარტმა.

რუსეთის მიერ პოლონეთის საჰაერო სივრცის დარღვევას უკრაინის საგარეო საქმეთა მინისტრი, ანდრეი სიბიგა გამოეხმაურა. მისი თქმით, პუტინის დაუსჯელობის შეგრძნება სულ უფრო იზრდება და მისი მოლაპარაკების მაგიდასთან დაჯდომა მხოლოდ იმ შემთხვევაშია შესაძლებელი, თუ ის ძლიერ ტრანსატლანტიკურ ზეწოლას იგრძნობს. მისივე თქმით, აუცილებელია უკრაინის საჰაერო თავდაცვის გაძლიერება და მხარდაჭერა.

"რუსული დრონების პოლონეთის ტერიტორიაზე შეჭრა უკრაინაზე მასიური თავდასხმის დროს ცხადყოფს, რომ პუტინის დაუსჯელობის შეგრძნება სულ უფრო იზრდება, რადგან ის წარსულში ჩადენილი დანაშაულებისთვის სათანადოდ არ დასჯილა.

პუტინი განაგრძობს ესკალაციას, აფართოებს თავის ომს და მუდმივად ცდის დასავლეთის სიმტკიცეს. რაც უფრო დიდხანს არ ხვდება ძალისმიერ პასუხს, მით უფრო აგრესიული ხდება.

ახლა სუსტი რეაქცია კიდევ უფრო მეტად გამოიწვევს რუსეთის პროვოცირებას — და შემდეგ რუსული რაკეტები და დრონები უფრო ღრმად შეიჭრებიან ევროპაში.

ამ ვითარებამ ნათლად აჩვენა, რომ გადაწყვეტილება მეზობელი ქვეყნების პარტნიორული საჰაერო თავდაცვის შესაძლებლობების გამოყენებაზე საბოლოოდ უნდა იქნას მიღებული, რათა უკრაინის საჰაერო სივრცეში დრონებისა და რაკეტების ჩამოგდება მოხდეს, მათ შორის NATO-ს საზღვრებისკენ მიმართული საფრთხის შემთხვევაში.

უკრაინა დიდი ხანია ამ ნაბიჯზე საუბრობს. ეს გადაწყვეტილება კოლექტიური უსაფრთხოების გამო უნდა იქნას მიღებული.

ეს ასევე არის მოწოდება პარტნიორებისადმი, რომ სასწრაფოდ გააძლიერონ უკრაინის საჰაერო თავდაცვა და უკეთ დაიცვან ქვეყანა რუსული დრონებისა და რაკეტების მზარდი რაოდენობისგან, რომლებიც რეგულარულად გვესხმიან თავს.

გარდა ამისა, სანქციები დაუყოვნებლივ უნდა გამკაცრდეს. პუტინი სერიოზულად მხოლოდ მაშინ დაფიქრდება სამშვიდობო მოლაპარაკებებზე, როცა ძლიერ ტრანსატლანტიკურ ზეწოლას იგრძნობს. რუსეთის სამხედრო მანქანა უნდა შეჩერდეს — და ის შეიძლება შეჩერდეს მხოლოდ ძალით, არა სისუსტით", — დაწერა სიბიგამ.

მომხდარს უკრაინის პრეზიდენტი, ვოლოდიმირ ზელენსკიც გამოეხმაურა. მან სოციალურ ქსელში დაწერა, რომ რუსეთის მიერ პოლონეთის საჰაერო სივრცის დარღვევაზე საპასუხო მკაცრი ნაბიჯები უნდა გადაიდგას. მისივე თქმით სანქციების პაუზა ძალიან დიდხანს გაგრძელდა და შეზღუდვების დაყოვნება რუსეთის მხრიდან დარტყმების სისასტიკეს გააძლიერებს.

"მოსკოვი ყოველთვის ამოწმებს შესაძლებლობების ზღვარს და თუ ის არ ხვდება ძლიერ რეაქციას, გადადის ესკალაციის ახალ დონეზე. დღეს ესკალაციისკენ კიდევ ერთი ნაბიჯი გადაიდგა — რუსულ-ირანული "შაჰედები" პოლონეთის საჰაერო სივრცეში მოძრაობდნენ, NATO-ს საჰაერო სივრცეში. ეს არ ყოფილა მხოლოდ ერთი "შაჰედი", რასაც შემთხვევითობა შეიძლება ეწოდოს, არამედ მინიმუმ რვა თავდასხმის დრონი, რომლებიც პოლონეთის მიმართულებით იყო გაშვებული.

ეს უკიდურესად სახიფათო პრეცედენტია ევროპისათვის. გაგრძელდება თუ არა შემდგომი ნაბიჯები, სრულად არის დამოკიდებული რეაქციის კოორდინაციასა და სიმტკიცეზე. რუსეთმა უნდა იგრძნოს შედეგები. რუსეთმა უნდა იგრძნოს, რომ ომის გაფართოება ვერ მოხერხდება და მისი დასრულება გარდაუვალი გახდება.

სანქციების პაუზა მეტისმეტად დიდხანს გაგრძელდა. შეზღუდვების გაჭიანურება რუსეთისა და მისი თანამზრახველების მიმართ მხოლოდ იმას ნიშნავს, რომ დარტყმების სისასტიკე იზრდება. საკმარისი იარაღია საჭირო, რათა შეჩერდეს რუსეთი. საჭიროა ძლიერი პასუხი — და ეს შეიძლება იყოს მხოლოდ ყველა პარტნიორის ერთიანი პასუხი: უკრაინის, პოლონეთის, ყველა ევროპელისა და შეერთებული შტატების. მადლობას ვუხდი ყველას, ვინც გვეხმარება", — დაწერა ვოლოდიმირ ზელენსკიმ.

პოლონეთის საჰაერო სივრცის დარღვევაზე შეშფოთება გამოთქვა ამერიკელმა კონგრესმენმა, ჯო უილსონმაც, რომელიც სოციალურ ქსელში წერს, რომ რუსეთის ეს ნაბიჯი ომის აქტი იყო და მოუწოდებს დონალდ ტრამპს საპასუხო სანქციების დაწესებისა და უკრაინისთვის ისეთი იარაღის გადაცემისკენ, რომლითაც რუსეთზე თავდასხმა იქნება შესაძლებელი.

"რუსეთი თავს ესხმის NATO-ს მოკავშირე პოლონეთს ირანული "შაჰედის" ტიპის დრონებით — სულ რაღაც ერთ კვირაზე ნაკლებ დროში მას შემდეგ, რაც პრეზიდენტმა ტრამპმა თეთრ სახლში პრეზიდენტ ნავროცკის უმასპინძლა. ეს არის ომის აქტი, და ჩვენ მადლიერები ვართ NATO-ს მოკავშირეების სწრაფი რეაქციისთვის ომის დამნაშავე პუტინის მხრიდან თავისუფალ და შრომისმოყვარე ერებზე გაგრძელებული, დაუსაბუთებელი აგრესიის წინააღმდეგ.

მე მოვუწოდებ პრეზიდენტ ტრამპს, ამ ქმედებას უპასუხოს სავალდებულო სანქციებით, რომლებიც რუსეთის საომარ მანქანას გააკოტრებს, და უზრუნველყოს უკრაინა ისეთი იარაღით, რომელიც შეძლებს რუსეთის ტერიტორიაზე დარტყმას. პუტინს აღარ აკმაყოფილებს მხოლოდ უკრაინაში დამარცხება დედებისა და ბავშვების დაბომბვით — ის უკვე უშუალოდ გამოცდის ჩვენს სიმტკიცეს NATO-ს ტერიტორიაზე.

პუტინმა განაცხადა, რომ "რუსეთს საზღვრები არ გააჩნია." თავისუფალი და აყვავებული ქვეყნები კი რუსეთს საზღვრების მნიშვნელობას ასწავლიან", — დაწერა ჯო უილსონმა.

პოლონეთის საჰაერო სივრცის უპრეცედენტო დარღვევას, ასევე ლატვიის პრეზიდენტი ედგარს რინკევიჩი გამოეხმაურა. მან სოციალურ ქსელში გავრცელებული განცხადებით პოლონეთს მხარდაჭერა და სოლიდარობა გამოუცხადა.

"სრული მხარდაჭერა და სოლიდარობა ჩვენს პოლონელ მეგობრებსა და მოკავშირეებს რუსეთის დრონების პოლონეთში შეჭრის გამო. ეს არის მკაფიო მტკიცებულება იმისა, რომ რუსეთის აგრესია უკრაინაში პირდაპირ გვეხება ჩვენც და საჭიროა შესაბამისი ზომების მიღება. მოკავშირეები ერთიანად მოქმედებდნენ და უნდა მოქმედებდნენ კიდეც", — დაწერა ლატვიის პრეზიდენტმა.