ამერიკის შეერთებული შტატების კონსერვატორი აქტივისტი, პრეზიდენტ დონალდ ტრამპის გავლენიანი მოკავშირე ჩარლი კირკი ოთხშაბათს, იუტას უნივერსიტეტში სიტყვით გამოსვლისას სასიკვდილოდ დაჭრეს. ამის შესახებ ინფორმაციას Reuters ავრცელებს.

შემთხვევა ორემში, იუტას ველის უნივერსიტეტში, დაახლოებით 3 000 ადამიანის თანდასწრებით მოხდა.

იუტას საზოგადოებრივი უსაფრთხოების დეპარტამენტის კომისარმა ბო მეისონმა პრესკონფერენციაზე თქვა, რომ თავდამსხმელი, რომელმაც 31 წლის კირკი ერთი გასროლით მოკლა, სავარაუდოდ, უნივერსიტეტის ერთ-ერთი შენობის სახურავზე იყო. შტატის პოლიციამ საღამოს გაავრცელა განცხადება, რომ ორი მამაკაცი ჰყავდათ დაკავებული და დაკითხული, თუმცა მათი სროლასთან კავშირი ვერ დადასტურდა და ორივე გაათავისუფლეს.

პრეზიდენტმა ტრამპმა ოვალურ კაბინეტში ჩაწერილ ვიდეომიმართვაში განაცხადა, რომ მისი ადმინისტრაცია მოძებნის არა მხოლოდ უშუალო დამნაშავეს, არამედ ყველა იმ ორგანიზაციასაც, ვინც "აფინანსებს და მხარს უჭერს ასეთ ძალადობას".

"ჩარლი კირკის საზარელი მკვლელობის გამო მწუხარებითა და ბრაზით ვარ სავსე. მან მილიონობით ადამიანი შთააგონა და ყველას, ვინც მას იცნობდა და უყვარდა, შოკი და საშინელება აერთიანებს. ეს ამერიკისთვის ბნელი მომენტია.

ის იყო პატრიოტი, რომელმაც თავისი ცხოვრება მიუძღვნა ღია დებატების საქმეს და ქვეყანას, რომელიც ასე ძალიან უყვარდა — ამერიკის შეერთებულ შტატებს. ის იბრძოდა თავისუფლებისთვის, დემოკრატიისთვის, სამართლიანობისთვის და ამერიკელი ხალხისთვის. ის სიმართლისა და თავისუფლებისთვის მოწამეა და არასდროს ყოფილა ვინმე, ვისაც ახალგაზრდობა ასე პატივს სცემდა.

მისი მისია იყო ახალგაზრდების პოლიტიკურ პროცესებში ჩართვა, რასაც ის ყველაზე უკეთ აკეთებდა, რათა გაეზიარებინათ ქვეყნის სიყვარული და გაევრცელებინათ საღი აზრი მთელი ქვეყნის მასშტაბით კამპუსებში.

დიდი ხანია დროა, ყველა ამერიკელმა და მედიამ შეხედოს იმ ფაქტს, რომ ძალადობა და მკვლელობა არის ტრაგიკული შედეგი იმისა, რომ ყოველდღიურად, წლიდან წლამდე, ყველაზე საძულველი და საზიზღარი გზით დემონიზაციას უწევთ იმ ადამიანებს, ვისაც არ ეთანხმებით.

მკვლელმა სცადა მისი ტყვიით გაჩუმება, მაგრამ ვერ შეძლო, რადგან ჩვენ ერთად უზრუნველვყოფთ, რომ მისი ხმა, მისი გზავნილი და მისი მემკვიდრეობა ცოცხალი იყოს უამრავი თაობისთვის. ამ საზარელი ქმედების გამო, ჩარლის ხმა უფრო დიდი და ხმაურიანი გახდა, ვიდრე ოდესმე", — თქვა აშშ-ის პრეზიდენტმა დონალდ ტრამპმა.

კირკის მკვლელობას სოციალურ ქსელში გამოეხმაურა კონგრესმენი ჯო უილსონი.

"შეძრწუნებული ვარ ჩარლი კირკის მკვლელობის გამო. ჩვენს ქვეყანაში ძალადობის ადგილი არ არის. კონსერვატორების მიმართ გამომწვევი ენის გამოყენებით გაწეულ წინააღმდეგობას შედეგები მოჰყვება. ვიცი, რომ ჩარლი ერთგული ადამიანი იყო, რომელიც აფასებდა ღმერთს, ოჯახს და ამერიკას. მე და როქსანი ვლოცულობთ მისი მეუღლის, ერიკასა და მათი შვილებისთვის", — დაწერა ჯო უილსონმა.

ტრამპის ბრძანებით, კირკის პატივსაცემად, ყველა სამთავრობო შენობაზე აშშ-ის დროშა კვირამდე ნახევრად დაშვებული იქნება.

მკვლელობის მოტივი ჯერჯერობით უცნობია. დამნაშავეს ამ დრომდე ეძებენ.

სროლის წინ კირკს აუდიტორიიდან შეიარაღებულ ძალადობაზე ჰკითხეს:

"იცით, რამდენი მასობრივი მსროლელი იყო ამერიკაში ბოლო 10 წლის განმავლობაში?" კირკმა უპასუხა: "თვლით თუ არა ბანდების ძალადობას?" — და რამდენიმე წამში გასროლა გაისმა.

ჩარლი კირკი Turning Point USA-ს — ყველაზე დიდი კონსერვატიული ახალგაზრდული ორგანიზაციის, თანადამფუძნებელი იყო, რომელიც ტრამპის ახალგაზრდა ამომრჩეველზე დიდ გავლენას ახდენდა. მას 5.3 მილიონი მიმდევარი ჰყავდა X-ზე, მართავდა პოპულარულ პოდკასტს და რადიოგადაცემას The Charlie Kirk Show და ხშირად ჩნდებოდა Fox News-ის ეთერში.