ზუგდიდის მერიის დაფინანსებით, ქალაქში UEFA-ს მესამე კატეგორიის სტანდარტების სტადიონი შენდება, რომელიც თითქმის დასრულებულია. თუმცა, ოფიციალური დასკვნის არ არსებობის მიუხედავად, სტადიონი, შესაძლოა, მესამე კატეგორიის მოთხოვნებს ვერ აკმაყოფილებდეს. ამის მიზეზი კი ისაა, რომ მოედანს, სარეკლამო ბანერებისთვის, ბეტონის კედელი შემოავლეს, რაც ფეხბურთელების უსაფრთხოებისთვისაც პრობლემაა. ზუგდიდის მერია აცხადებს, რომ პროექტი საქართველოს ფეხბურთის ფედერაციას შეუთანხმა, ფედერაციაში კი საპირისპიროს ამტკიცებენ.

უეფა-ს ოთხი კატეგორიის სტადიონების სტანდარტი აქვს. ზუგდიდის მერიას მესამე კატეგორიის სტადიონის გახსნის პრეტენზია აქვს. საქართველოს ფეხბურთის ფედერაციის სტადიონების ინსპექტირების განყოფილების უფროსის, მამუკა კვარაცხელიას განმარტებით, ამ კატეგორიის სტადიონის მოედანი, აუცილებლად უნდა იყოს 105 მეტრი სიგრძისა და 68 მეტრი სიგანის.

კვარაცხელიას თქმით, ფეხბურთის ფედერაციას სტადიონის მშენებლობაში ჩარევის უფლება არ აქვს. მისივე თქმით, ოფიციალური მიმართვის შემთხვევაში, კომისია ჩავა, შეისწავლის და შესაბამის დასკვნას დაუდებს ფედერაციას, რომელი კატეგორიის სტადიონია ის და საქართველოს რომელი ლიგის მატჩები შეიძლება გაიმართოს. არა ოფიციალურად, თუმცა მამუკა კვარაცხელია ზუგდიდში იმყოფებოდა. მისი თქმით, პირველადი დაკვირვებით, სტადიონი მესამე კატეგორიის სტანდარტებში ვერ ჯდება.

"ყველა სტადიონზე ვარ ევროპის ნამყოფი, პირველად ვნახე ასეთ რამ", - ასე პასუხობს მამუკა კვარაცხელია On.ge-ს კითხვას ბეტონის კედელთან დაკავშირებით. მისივე თქმით, კედელი მინდვრის საზღვრებიდან აუცილებელად 6 მეტრით უნდა იყოს დაშორებული, ახლა კი მხოლოდ 4 მეტრია. კვარაცხელია, ასევე, ამბობს, რომ კედლის გამო, სტადიონმა, შესაძლოა, მხოლოდ უეფა-ს მეორე კატეგორიის სტანდარტები დააკმაყოფილოს:

"მეორე კატეგორიის სტადიონი შესაძლებელია იყოს სიგრძე 100 მეტრი და სიგანე 64 მეტრი."

ზუგდიდის მერია კი ამტკიცებს, რომ სტადიონის პროექტი მომზადებულია მაღალკვალიფიციური სპეციალისტების მიერ, შედგენილია უეფა-ს სტანდარტების შესაბამისად და შეთანხმებულია ფეხბურთის ფედერაციასთან. მერიამ დოკუმენტიც გაასაჯაროვა, რომელიც მათი თქმით, სტადიონის პროექტის შესწავლისა და კვალიფიციური დასკვნის შესახებ გადაწყვეტილებაა და მას ხელს აწერს დომენტი სიჭინავა, ფეხბურთის ფედერაციის იმდროინდელი პრეზიდენტი.

"სტადიონი საქართველოს ფეხბურთის ფედერაციის დებულების შესაბამისად და დებულებით განსაზღვრული უსაფრთხოების წესების დაცვით შენდება."

მამუკა კვარაცხელია დარწმუნებულია, რომ ბეტონის მონგრევის შემთხვევაში, სტადიონის ზომებს და უსაფრთხოების სტანდარტს ეშველება, თუმცა ხაზს უსვამს, რომ ეს ოფიციალური დასკვნა არ არის:

"გასახდელია, სამსაჯოა, და ა.შ. მთავარი სტადიონი არ არის [მნიშნველოვანი]. არის რაღაც რაღაც დარღვევები, მაგრამ გამოსწორებადია და ვუთხარი კიდეც."

მამუკა კვარაცხელიას თქმით, უეფა-ზე პირველი და მეორე ტურის მოგების და პლეიოფში გასვლის შემთხვევაში, გუნდს შეუძლია მესამე კატეგორიის სტადიონზე ითამაშოს. აღსანიშნავია, რომ ქართულ გუნდებს პირველი ტურის გადალახვაც უჭირთ.