შინაგან საქმეთა სამინისტროს ინფორმაციით, თბილისის მერიასთან ერთიანი ნაციონალური მოძრაობის მიერ გამართულ აქციაზე ექვსი პირი დააკავეს. უწყების თქმით, პარტიის წევრები და მისი მხარდამჭერები მერიის შენობაში შეჭრას აპირებდნენ:

"აქციის მონაწილეებმა გზის სავალი ნაწილი გადაკეტეს, რის შედეგადაც, კოსტავას გამზირზე მოძრაობა პარალიზებული აღმოჩნდა."

აღნიშნულ ფაქტზე შსს-მ ადმინისტრაციულ სამართალდარღვევათა კოდექსის 166-ე (ხულიგნობა) და 173-ე (დაუმორჩილებლობა) მუხლებით გამოძიება დაიწყო.

დღეს, ენმ-ის თბილისის მერობის კანდიდატმა და პარტიის მხარდამჭერებმა თბილისის მერიასთან გზა გადაკეტეს და მერთან შეხვედრას ითხოვდნენ. როგორც ნაციონალური მოძრაობის თბილისის მერობის კანდიდატი, ზაალ უდუმაშვილი ამბობს, მათ მერიის მაღალჩინოსნებთან დალაპარაკება სურდათ. ისინი პანორამა თბილისისთვის მიწების გადაცემის წინააღმდეგ გამოდიოდნენ.

25 მომხრე, 3 წინააღმდე - 29 სექტემბერს თბილისის საკრებულომ პანორამა თბილისისთვის პუშკინის სკვერთან 1 946 მ2-ის ფართობის მიწის ნაკვეთის გადაცემას მხარი დაუჭირა. პუშკინის სკვერთან, პანორამა თბილისის სასტუმროს მიმდებარედ მიწისქვეშა ავტოსადგომის ასაშენებლად მიწის ნაკვეთს ფუნქციური ზონის სტატუსი შეეცვალა. ასევე, სოლოლაკის ქედზე 4 677 მ2 ტერიტორიას ლანდშაფტური ზონის სტატუსი შეეცვლა და პანორამა თბილისს გოლფის მოედნის დამხმარე სათავსოების ასაშენებლად გადაცემა.

პანორამა თბილისი საქართველოს ყოფილი პრემიერ-მინისტრისა და მმართველი პარტიის - ქართული ოცნების დამფუძნებლის, ბიძინა ივანიშვილის ინიციატივით შენდება.