ისრაელის სასწრაფო დახმარების სამსახურის ცნობით, იერუსალიმის შემოგარენში მდებარე ავტობუსის გაჩერებაზე სროლის შედეგად 5 ადამიანი დაიღუპა, ხოლო პოლიციის ინფორმაციით, თავდამსხმელები ლიკვიდირებულნი არიან. ამის შესახებ ცნობებს Reuters ავრცელებს.

ჯერ კიდევ არ არის გარკვეული ვინ ჩაიდინა თავდასხმა ან რა იყო მოტივი. პალესტინურმა "ჰამასმა" ორი პალესტინელ "მებრძოლი" შეაქო, რომლებიც, მათი თქმით, თავდასხმაში მონაწილეობდნენ, თუმცა პასუხისმგებლობა მათ არ აუღიათ.

სასწრაფო დახმარების სამსახურმა მსხვერპლებს შორის დაასახელა 50 წლის კაცი, 50 წლის ქალი და დაახლოებით 30 წლის სამი კაცი. გარდა ამისა, ცეცხლსასროლი იარაღიდან მიყენებული ჭრილობებით 11 ადამიანი დაშავდა, მათგან 6 მძიმე მდგომარეობაშია.

ისრაელის პოლიციის ცნობით, ორი თავდამსხმელი ავტომობილით მივიდა "რამოთის გასასვლელთან" მდებარე ავტობუსის გაჩერებაზე და ცეცხლი გახსნა. ადგილზე მყოფმა უსაფრთხოების თანამშრომელმა და ერთმა სამოქალაქო პირმა თავდამსხმელები ადგილზე მოკლეს. პოლიციამ შემთხვევის ადგილას იარაღი, ვაზნები და დანა აღმოაჩინა, თავდამსხმელები კი "ტერორისტებად" მოიხსენია.

თავდასხმა პალესტინურმა დაჯგუფება "ისლამურმა ჯიჰადმაც" შეაქო, თუმცა პასუხისმგებლობა მათაც არ აუღიათ.

ისრაელის სამხედროებმა განაცხადეს, რომ ადგილზე ჯარისკაცები არიან მობილიზებული და პოლიციას ეჭვმიტანილების ძებნაში ეხმარებიან.