"ამ ჟესტით ბიძინა ივანიშვილმა თავისი თავი გაყიდა, რომ მას ყველაზე მეტად უნდა 4 ოქტომბერს ლეგიტიმაციის მსგავსი მიიღოს," — ასე ეხმაურება ფედერალისტების ლიდერი თამარ ჩერგოლეიშვილი ოცნების დანიშნული პრეზიდენტის, მიხეილ ყაველაშვილის მიერ კოალიცია ლელო — ძლიერი საქართველოს ლიდერების, მამუკა ხაზარაძისა და ბადრი ჯაფარიძის შეწყალებას.

თამარ ჩერგოლეიშვილმა ლელოს მოუწოდა, დაუბრუნდეს "ერთობის რაციონალურ გზას" და "გამოუსვას ცელი ბიძინა ივანიშვილს იქ, სადაც მას სტკივა"

"ივანიშვილის დღევანდელი ჟესტით, კონკრეტულად პოლიტპატიმარ ხაზარაძის და პოლიტპატიმარ ჯაფარიძის შეწყალებით კიდევ ერთხელ გაესვა ხაზი იმას, რამდენად მნიშვნელოვანია ივანიშვილისთვის 4 ოქტომბერს არჩევნებად წოდებული ფარსის თუნდაც მოჩვენებითი ლეგიტიმაცია, თუნდაც საზოგადოების მცირე ნაწილში. ამას ემსახურებოდა ჯაფარიძის და ხაზარაძის გამორჩევა, რომ შექმნას ისეთი წარმოდგენა, თუნდაც საზოგადოების მცირე ნაწილში, რომ რასაც 4 ოქტომბერს რეჟიმი ჩაატარებს, იმას არჩევნები ჰქვია.

ამიტომ, მიუხედავად იმ უდიდესი განსხვავებებისა, რაც ფედერალისტებს და ლელოს შორის არის, მიუხედავად იმ უამრავი დაპირისპირებისა, რაც ჩვენ შორის ყოფილა, ჩვენ მოვუწოდებთ ლელოს, დაუბრუნდეს ერთობის რაციონალურ გზას, გამოუსვას ცელი ბიძინა ივანიშვილს იქ, სადაც მას სტკივა და ცხადია, რომ მას სჭირდება თვითმმართველობის არჩევნებად წოდებული ფარსის ლეგიტიმაცია, ხელი აიღოს ქართველი ხალხი მოტყუებაზე და რეჟიმის თანამზრახველობაზე ხალხის მოტყუებაში და დაუბრუნოს ღირსეული პასუხი იმით, რომ არჩევნებში არ შევა, გააერთიანებს ამით ოპოზიციურ საზოგადოებას და ძალიან დიდ სიკეთეს მოიტანს.

მზად ვარ, თუ ამას გააკეთებს, 4 ოქტომბრამდე თავს არ დავესხა. თავდაუსხმელობას ხომ ითხოვენ და მზად ვარ, 4 ოქტომბრამდე ეს ყველაფერი ავიტანო.

ამ ჟესტით ბიძინა ივანიშვილმა თავისი თავი გაყიდა, რომ მას ყველაზე მეტად უნდა 4 ოქტომბერს თუნდაც ლეგიტიმაციის მსგავსი მიიღოს, ამიტომ გაათავისუფლა. ეს არ არის ხაზარაძისა და ჯაფარიძის წინააღმდეგ გადადგმული ნაბიჯი. ეს არის ივანიშვილის თვითინტერესში გადადგმული ნაბიჯი, რომ ძალაუფლება შეინარჩუნოს და 4 ოქტომბერს კიდე ერთხელ გაიფორმოს რაღაც ვადით მიტაცებული ქვეყანა. ხაზარაძეს და ჯაფარიძეს ახლა აქვთ შანსი, რომ გადადგან ძალიან დიდი ნაბიჯი ოპოზიციური ერთობისკენ. ჩვენ რეჟიმის დელეგიტიმაციას მოვახდენთ ყველა დონეზე, ვისაც ამის იმედი არ გაქვთ, გაიხსენეთ ბექა ოდიშარიას ყანყალი და ბანცალი, ზუსტად ასე ყანყალებს რეჟიმი, სახედაკარგულია, დემორალიზებულია, ყველაზე მეტად მას სჭირდება ახლა თუნდაც ლეგიტიმაციის მსგავსის მიღება, ამიტომ გადადგა ეს ნაბიჯი და მნიშვნელოვანია, რომ ხაზარაძემ და ჯაფარიძემ სწორად იმოქმედონ," — განაცხადა თამარ ჩერგოლეიშვილმა.

ოცნების დანიშნულმა პრეზიდენტმა მიხეილ ყაველაშვილმა დღეს დილით სოციალურ ქსელში დაწერა, რომ ლელო — ძლიერი საქართველოს ლიდერები მამუკა ხაზარაძე და ბადრი ჯაფარიძე შეიწყალა. მისი თქმით, ეს გადაწყვეტილება იმიტომ მიიღო, რომ "არავის დარჩეს იმის თქმის საბაბიც კი, რომ ადგილობრივი თვითმმართველობის არჩევნები შეზღუდული კონკურენტუნარიანობის პირობებში ტარდება".

ყაველაშვილი აღნიშნავს, რომ "შეთავაზებას შეწყალების შესახებ შესაბამისმა პატიმრებმა რამდენიმე კვირის წინ უარით უპასუხეს".