"სამოქალაქო საზოგადოების ორგანიზაციების საქმიანობასთან დაკავშირებით მიმდინარე გამოძიება მათი დევნისა და შევიწროების სისტემური პოლიტიკის გაგრძელებაა და სისხლის სამართლის პოლიტიკური ინსტრუმენტალიზების კიდევ ერთი უმძიმესი შემთხვევაა," — ამის შესახებ სოციალური სამართლიანობის ცენტრის განცხადებაშია აღნიშნული.

მათი თქმით, განცხადებები, რომლებიც გამოხატვის თავისუფლებაში ექცევა, ვერანაირ დანაშაულად ვერ ჩაითვლება.

SJC-ის განცხადებით, პროკურატურის მიერ 7 არასამთავრობო ორგანიზაციის დაყადაღებამ პრაქტიკულად ორგანიზაციების პარალიზება მოახდინა და ისინი საქმიანობას, მათ შორის, ბენეფიციარების ინტერესების დაცვას, მოხალისეობრივ საწყისებზე აგრძელებენ.

სოციალური სამართლიანობის ცენტრის განცხადებით, ამ გადაწყვეტილებას ორგანიზაცია გაასაჩივრებს როგორც ადგილობრივ, ისე საერთაშორისო დონეზე

"ხვალ, 5 სექტემბერს, 13:00 საათზე, სოციალური სამართლიანობის ცენტრის დირექტორი, თამთა მიქელაძე მაგისტრატ მოსამართლესთან გამოიკითხება.

გამოკითხვა უკავშირდება ე.წ. "პირბადეების საქმეს", რომელზეც გამოძიება პროკურატურამ ჯერ კიდევ 2025 წლის თებერვალში დაიწყო და რომლის ფარგლებშიც გამოძიება საბოტაჟის, დამამძიმებელ გარემოებაში საბოტაჟის მცდელობის და სხვა მსგავსი დანაშაულების ირგვლივ მიმდინარეობს.

ჩვენი შეფასებით, გამოძიება აშკარად უსაფუძვლოა, რადგან ჩვენი ორგანიზაციის წინააღმდეგ გამოყენებული არგუმენტები, კერძოდ, პირბადეებისა და თავდაცვის საშუალებების თანამშრომლების უსაფრთხოების მიზნით, ლიმიტირებული ოდენობით შეძენა, წამებისა და ძალადობის მსხვერპლების სამართლებრივი დაცვა და, ასევე, საჯარო პოსტები და განცხადებები, რომლებიც გამოხატვის თავისუფლებაში ექცევა, ცხადია, ვერანაირ დანაშაულად ვერ ჩაითვლება. სამოქალაქო საზოგადოების ორგანიზაციების საქმიანობასთან დაკავშირებით მიმდინარე გამოძიება მათი დევნისა და შევიწროების სისტემური პოლიტიკის გაგრძელებაა და სისხლის სამართლის პოლიტიკური ინსტრუმენტალიზების კიდევ ერთი უმძიმესი შემთხვევაა.

როგორც საზოგადოებისთვის ცნობილია ამავე საქმის ფარგლებში, პროკურატურის მოთხოვნის საფუძველზე, 2025 წლის 27 აგვისტოს ყადაღა დაედო შემდეგი 7 ორგანიზაციის ანგარიშებს: "სამოქალაქო საზოგადოების ფონდი", ISFED, IDFI, GDI, "დემოკრატიის მცველები", "საფარი" და "სოციალური სამართლიანობის ცენტრი". ამ გადაწყვეტილებამ პრაქტიკულად ორგანიზაციების პარალიზება მოახდინა და ისინი საქმიანობას, მათ შორის, ბენეფიციარების ინტერესების დაცვას, მოხალისეობრივ საწყისებზე აგრძელებენ.

ამ გადაწყვეტილებას სოციალური სამართლიანობის ცენტრი გაასაჩივრებს როგორც ადგილობრივ, ისე საერთაშორისო დონეზე," — ნათქვამია სოციალური სამართლიანობის ცენტრის განცხადებაში.

ასევე იხილეთ: