პარიზში "მსურველთა კოალიციის" შეხვედრა მიმდინარეობს, სადაც პოლიტიკური ლიდერები უკრაინისთვის მტკიცე უსაფრთხოების გარანტიების საბოლოოდ შეთანხმებას ცდილობენ. ამის შესახებ ინფორმაციას The Guardian ავრცელებს.

შეხვედრაზე მივიდნენ: უკრაინის პრეზიდენტი, ვოლოდიმირ ზელენსკი; ევროკომისიის პრეზიდენტი, ურსულა ფონ დერ ლაიენი; ნიდერლანდების პრემიერმინისტრი, დიკ სხოფი; ფინეთის პრეზიდენტი, ალექსანდერ სტუბი; ევროპული საბჭოს პრეზიდენტი, ანტონიუ კოშტა; ბელგიის პრემიერმინისტრი, ბარტ დე ვევერი; დანიის პრემიერმინისტრი, მეტე ფრედერიქსენი; პოლონეთის პრემიერმინისტრი, დონალდ ტუსკი.

ლიდერების ნაწილი შეხვედრას ონლაინაც შეუერთდება.

სხდომის გახსნისას საფრანგეთის პრეზიდენტმა, ემანუელ მაკრონმა აღნიშნა, რომ ლიდერები შეიკრიბნენ "უკრაინისთვის მტკიცე უსაფრთხოების გარანტიების საბოლოოდ შესამუშავებლად, და იმ სამუშაოს დასასრულებლად, რაც ბოლო კვირებში განხორციელდა".

მისი ძალიან მოკლე განცხადებების შემდეგ, მედიას სხდომის დატოვება სთხოვეს.

ლიდერები, სავარაუდოდ, დღის მეორე ნახევარში აშშ-ის პრეზიდენტთან, დონალდ ტრამპთან ისაუბრებენ და შეხვედრის დასრულების შემდეგ ბრიფინგს ჩაატარებენ.