საქართველოს პარლამენტის დეპუტატები, პატრიოტთა ალიანსის წევრები ადა მარშანია, ნატო ჩხეიძე და გიორგი ლომია მოსკოვში, რუს პარლამენტარებთან შესახვედრად კიდევ ერთხელ გაემგზავრნენ. ადა მარშანიას განცხადებით, ვიზიტი რამდენიმედღიანია და ისინი, სავარაუდოდ, სამ დღეში დაბრუნდებიან:

"მთავარი სასაუბრო თემა ჩვენთვის ყოველთვის იქნება, სადაც არ უნდა ჩავიდეთ, და რა საკვირველია, პირველ რიგში მოსკოვში, ჩვენი ტერიტორიები, ჩვენი სოხუმი და ჩვენი ცხინვალი და ჩვენი ქვეყნის გამთლიანების უმძიმესი საკითხი."

მარშანია და პარტიის რამდენიმე წევრი საქართველოს ოკუპანტ ქვეყანაში, რუსეთში რამდენიმე თვის წინაც იყვნენ. მაშინ პატრიოტთა ალიანსის წევრები რუსეთის დუმის რამდენიმე დეპუტატს შეხვდნენ. შეხვედრის შემდეგ, ადა მარშანიამ განაცხადა, რომ რუს დეპუტატებს რუსეთ-საქართველო-ნატოს ფორმატის შექმნა შესთავაზეს. გარდა ამისა, ისაუბრეს ვიზების გამარტივებისა და სხვა საკითხებზე.