"დღესაც მომსწრე ვართ, თუ როგორ უთხრის ძირს ოპოზიციიდან ნაციონალური მოძრაობა ქართულ დემოკრატიას", — ამის შესახებ ოცნების პარლამენტის თავმჯდომარემ, შალვა პაპუაშვილმა ოცნების პარლამენტის დროებითი საგამოძიებო კომისიის მიერ მომზადებულ 400-გვერდიან დასკვნაზე საუბრისას განაცხადა. მისი თქმით, ამ ანგარიშში, "დეტალურადაა აღწერილი ყველა ის ჩვენება, ის მტკიცებულება, რომელიც ნაციონალური მოძრაობის რეჟიმს შეეხება".

"დღეს პარლამენტი პლენარული სხდომის ფარგლებში განიხილავს საგამოძიებო კომისიის საბოლოო ანგარიშს, 400 გვერდზე მეტი მოცულობის არის ეს ანგარიში, სადაც დეტალურად არის აღწერილი ყველა ის ჩვენება, ის მტკიცებულება, რომელიც ნაციონალური მოძრაობის რეჟიმს შეეხება ხელისუფლებაში 2012 წლამდე და 2012 წლის შემდეგ, ნაციონალურ მოძრობას, როგორც ანტიდემოკრატიულ, ექსტრემისტულ ორგანიზაციას ოპოზიციაში. ჩვენ ამ თვეების განმავლობაში ვისმენდით და ვიხსენებდით იმ რეჟიმს, რომელიც დამყარებული ჰქონდა გარე დახმარებით ნაციონალურ მოძრაობას საქართველოში. ვისმენდით ყველა იმ ტკივილს, დანაშაულს, რომელსაც ეს რეჟიმი ჩადიოდა. დღესაც მომსწრე ვართ, თუ როგორ უთხრის ძირს ოპოზიციიდან ნაციონალური მოძრაობა ქართულ დემოკრატიას, თუნდაც დღეს მიმდინარე პროცესები, როდესაც ისინი ღიად საუბრობენ ძალადობრივი გზით ხელისუფლებაში მოსვლაზე, საუბრობენ დამხობაზე და ამის ნორმალიზებას ახდენენ მათი უცხოელი მფარველები, რომლებიც ჯერ კიდევ ხელს ართმევენ ამ ანტიდემოკრატიულ, ექსტრემისტულ დაჯგუფებას. განხილვის შემდეგ პარლამენტი ანგარიშთან დაკავშირებით თავის პოზიციას დააფიქსირებს", — განაცხადა შალვა პაპუაშვილმა.