სახალხო დამცველი პირველ ოქტომბერს ხანდაზმულთა საერთაშორისო დღეს გამოეხმაურა და აღნიშნა, რომ ასაკოვანი ადამიანების უმეტესობა სიღარიბის, უსახლკარობისა და იზოლაციის საფრთხის ქვეშ იმყოფებიან. მისივე თქმით, ხშირია მათ მიმართ ძალადობის, უგულებელყოფისა და ასაკის ნიშნით დისკრიმინაციის ფაქტები.

ომბუდსმენის განცხადებით, ხანდაზმულ პირთა უფლებების დაცვის კუთხით ქვეყანაში კვლავაც მრავალი გამოწვევა არსებობს:

"ქვეყანაში არსებული სახელმწიფო პროგრამებით არ არის გათვალისწინებული ხანდაზმულთა ალტერნატიული ზრუნვის სერვისები, არ ხდება საჭიროების კვლევაზე დაფუძნებული მიზნობრივი პროგრამების შემუშავება, პრობლემურია ადგილობრივ დონეზე ამ პირთა სოციალური კეთილდღეობის უზრუნველყოფისა და არსებული რესურსების ეფექტურად განაწილების საკითხი".

2017 წელს ხანდაზმულ პირთა საერთაშორისო დღის მთავარ თემად დასახელდა ასაკოვანი ადამიანების როლისა და კონტრიბუციის გაზრდა/გაფართოება ოჯახის, თემისა და საზოგადოების ცხოვრებაში. ომბუდსმენის თქმით, მადრიდის საერთაშორისო გეგმით განსაზღვრული ვალდებულებები გარკვეულწილად აისახა საქართველოს პარლამენტის მიერ 2016 წელს დამტკიცებულ საქართველოში მოსახლეობის დაბერების საკითხზე სახელმწიფო პოლიტიკის კონცეფციაში, თუმცა სამოქმედო გეგმა ამ დრომდე არ დამტკიცებულა.

სახალხო დამცველი განცხადებით, მიმდინარე წელს ჩვენს ხანდაზმულთა უფლებების დარღვევის ფაქტების უმრავლესობა მათი სოციალური დაცვის საკითხებს ეხებოდა:

" რაც კიდევ ერთხელ ნათლად აჩვენებს ამ მიმართულებით სახელმწიფოს არაეფექტურ პოლიტიკასა და აღნიშნული პრობლემის დაძლევისთვის კონკრეტული სამოქმედო გეგმის შემუშავების აუცილებლობას".

ომბუდსმენი მოუწოდებს მთავრობას დაამტკიცოს ეროვნული სამოქმედო გეგმა, რათა სათანადოდ იქნას დაცული ხანდაზმულთა უფლებები.