"ეს დემოკრატიისთვის უზარმაზარი უკან გადადგმული ნაბიჯია" — ასე ეხმაურება ესტონეთის საგარეო საქმეთა სამინისტრო საქართველოში ოცნების ანტიკორუფციული ბიუროს მიერ 7 არასამთავრობო ორგანიზაციის ანგარიშების დაყადაღებას

როგორც უწყება გავრცელებულ განცხადებაში აღნიშნავს, ეს არის "პირდაპირი დარტყმა იმ მოქალაქეებისთვის, რომლებიც საკუთარ სასიცოცხლოდ მნიშვნელოვან სამუშაოზე არიან დამოკიდებულნი"

"საქართველოს მთავრობამ შვიდი სამოქალაქო საზოგადოების ორგანიზაციის საბანკო ანგარიშები გაყინა.

ეს დემოკრატიისთვის უზარმაზარი უკან გადადგმული ნაბიჯია და პირდაპირი დარტყმა იმ მოქალაქეებისთვის, რომლებიც საკუთარ სასიცოცხლოდ მნიშვნელოვან სამუშაოზე არიან დამოკიდებულნი.

სამოქალაქო საზოგადოების ორგანიზაციები აუცილებელია უფლებების დასაცავად, თემების მხარდასაჭერად და ადამიანებისთვის ხმის მისაცემად," — აღნიშნულია განცხადებაში.

ცნობისთვის, პროკურატურის ინფორმაციით, 27 აგვისტოს ყადაღა დაედო 7 არასამთავრობო ორგანიზაციის საბანკო ანგარიშებს, რითაც შეიზღუდა ფულადი სახსრების შემდგომი არამიზნობრივი განკარგვა.

უწყების ცნობით, NGO-ებს ყადაღა დაედოთ საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების წინააღმდეგ მიმართული საქმიანობისთვის ფინანსების მობილიზების ფაქტზე პროკურატურაში მიმდინარე გამოძიების ფარგლებში.

პროკურატურის ცნობით, ამ არასამთავრობო ორგანიზაციების "ფინანსები გამოყენებული იქნა ისეთი აღჭურვილობის შესაძენად, როგორიც არის — სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები".

ასევე იხილეთ: