ევროპარლამენტარი რასა იუკნევიჩიენე 7 ქართული არასამთავრობო ორგანიზაციის დაყადაღებას სოციალურ ქსელში გამოეხმაურა. მისი თქმით, ევროპარლამენტმა უკვე განსაზღვრა, როგორ უნდა უპასუხოს ქართული ოცნების ამ ნაბიჯს.

"ქართული ოცნება ამკაცრებს რეპრესიებს მშვიდობიანი მომიტინგეების წინააღმდეგ.

თბილისის საქალაქო სასამართლომ გაყინა 7 საზოგადოებრივი ორგანიზაციის საბანკო ანგარიშები ყალბი "საბოტაჟის" საქმის ფარგლებში — მხოლოდ იმიტომ, რომ ისინი მომიტინგეებს საბაზისო დამცავ საშუალებებს აწვდიდნენ.

ევროპარლამენტმა უკვე განსაზღვრა, როგორ უნდა უპასუხოს ამ ყველაფერს ევროკავშირმა.

ვერ დავუშვებთ, რომ საქართველო დავიწყებას მიეცეს", — დაწერა იუკნევიჩიენემ.

ცნობისთვის, პროკურატურის ინფორმაციით, 27 აგვისტოს ყადაღა დაედო 7 არასამთავრობო ორგანიზაციების საბანკო ანგარიშებს, რითაც შეიზღუდა ფულადი სახსრების შემდგომი არამიზნობრივი განკარგვა.

NGO-ებს ყადაღა საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების წინააღმდეგ მიმართული საქმიანობისთვის ფინანსების მობილიზების ფაქტზე პროკურატურაში მიმდინარე გამოძიების ფარგლებში დაედოთ.

პროკურატურის ცნობით, ამ არასამთავრობო ორგანიზაციების "ფინანსები გამოყენებული იქნა ისეთი აღჭურვილობის შესაძენად, როგორიც არის — სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები".

არასამთავრობო ორგანიზაციებმა ანტიკორუფციული ბიუროს წინააღმდეგ თბილისის საქალაქო სასამართლოსი სარჩელი შეიტანეს. ამის შესახებ არასამთავრობო ორგანიზაციების წარმომადგენლებმა დღეს ერთობლივი ბრიფინგზე განაცხადეს. ისინი ანტიკორუფციული ბიუროს ხელმძღვანელის რაჟდენ კუპრაშვილის 31 მაისის ბრძანების ბათილად ცნობას ითხოვენ, რომლის საფუძველზეც მათ მიმართ მოკვლევა მიმდინარეობს.