უკრაინის პრეზიდენტის ვოლოდიმირ ზელენსკის თქმით, დარნიცკის რაიონში, საცხოვრებელ კორპუსზე რუსეთის დარტყმის ადგილას სამაშველო სამუშაოები დასრულდა. კიევზე რუსეთის მიერ 28 აგვისტოს მიტანილი იერიშის შედეგად მთლიანობაში 23 ადამიანი დაიღუპა, ხოლო რვა ადამიანის ბედი ამ დრომდე უცნობია.

"უკრაინის შინაგან საქმეთა მინისტრმა, იგორ კლიმენკომ, გამოაქვეყნა ანგარიში. კიევში, დარნიცკის რაიონში, საცხოვრებელ კორპუსზე რუსეთის დარტყმის ადგილას სამაშველო სამუშაოები დასრულდა. ამჟამად მიმდინარეობს დანგრეული კონსტრუქციების გაწმენდა. ამ დროისთვის ცნობილია, რომ მხოლოდ ამ ერთ ადგილას 22 ადამიანი დაიღუპა, მათ შორის ოთხი ბავშვი. ყველაზე პატარა გოგონას სამი წლისაც არ იყო. ჩემი თანაგრძნობა გარდაცვლილთა ოჯახებსა და ახლობლებს. მთლიანობაში, იმ ღამეს, რუსებმა კიევში 23 ადამიანი მოკლეს. რვა ადამიანის ბედი ამ დრომდე უცნობია. კიდევ 53 ადამიანი დაიჭრა. ყველა მათგანს შესაბამისი დახმარება გაეწია. მადლობას ვუხდი მაშველებს, პოლიციელებს, ექიმებსა და მედდებს, ყველა მუნიციპალურ და საგანგებო სამსახურს, თითოეულ ადამიანს, ვინც ჩართულია დახმარებაში", — დაწერა ვოლოდიმირ ზელენსკიმ.

ცნობისთვის, რუსეთის მიერ უკრაინაზე ბოლო თავდასხმა 28 აგვისტოს ღამით დაიწყო. ოკუპანტებმა კიევს დრონებითა და რაკეტებით შეუტიეს. რუსეთმა 629 საჰაერო თავდასხმის ობიექტი გამოიყენა.

კიევში რუსული თავდასხმის შედეგად დაღუპულთა რიცხვი 22-მდე გაიზარდა