ნაციონალური მოძრაობის ინფორმაციით, თბილისის საკრებულოში გამართული აქციის დროს მათი აქტივისტი დააკავეს.

შსს-მ On.ge-ს დაუდასტურა, რომ დაკავებულია ერთი პირი, ადმინისტრაციული სამართალდარღევათა კოდექსის 166-ე და 173 მუხლით, რაც წვრილმან ხულიგნობასა და პოლიციისთვის წინააღმდეგობის გაწევას გულისხმობს.

თბილისის საკრებულომ ბიძინა ივანიშვილთან დაკავშირებული კომპანიის სასარგებლოდ, პუშკინის სკვერთან 1 946 მ2-ის ფართობის მიწის ნაკვეთის ფუნქციური ზონის სტატუსის შეცვლას მხარი დაუჭირა. გავრცელებული ინფორმაციით, აღნიშნულ კომპანიას პუშკინის სკვერთან პანორამა თბილისის სასტუმროს მიმდებარედ, მიწისქვეშა ავტოსადგომის აშენება სურს და ამ ტერიტორიის 1 ლარად გადაცემას ითხოვს. ასევე, სოლოლაკის ქედზე 4 677 მ2 ტერიტორიას ლანდშაფტური ზონის სტატუსი შეეცვლა და პანორამა თბილისს გოლფის მოედნის დამხმარე სათავსოების ასაშენებლად გადაეცემა.

სხდომის დაწყებამდე სხდომათა დარბაზში მივიდნენ თბილისის მერობის კანდიდატები ევროპული საქართველოდან - ელენე ხოშტარია და ნაციონალური მოძრაობიდან - ზაალ უდუმაშვილი. საკრებულოს დაცვის თანამშრომლებმა მერობის კანდიდატები და პარტიზანი მებაღე ნატა ფერაძე დარბაზიდან ძალის გამოყენებით გაიყვანეს.

საკრებულოს წევრმა, ალეკო ელისაშვილმა სხდომათა დარბაზი პროტესტის ნიშნად დატოვა.