BBC-ის ინფორმაციით, უკრაინის პრეზიდენტმა ვოლოდიმირ ზელენსკიმ ვლადიმერ პუტინის შეთავაზებაზე, კრემლის ლიდერთან შეხვედრა მოსკოვში გამართულიყო, უარი თქვა, — დღეს, 20 აგვისტოს, შეერთებული შტატების პრეზიდენტმა, დონალდ ტრამპმა განაცხადა, რომ მხარეები ორმხრივი შეხვედრის ორგანიზების პროცესში არიან.

"ისინი შეხვედრის ორგანიზების პროცესში არიან, ჩვენ მკვლელობები უნდა შევაჩეროთ," — თქვა მან.

როდის შედგება ზელენსკისა და პუტინს შორის შეხვედრა, დამოკიდებულია იმაზე, თუ როდის შეთანხმდებიან მხარეები შეხვედრის ადგილზე.

გერმანიის კანცლერმა ფრიდრიხ მერცმა ვაშინგტონში აშშ-ის პრეზიდენტ დონალდ ტრამპის, ზელენსკის და ევროპელი ლიდერების სამიტის შემდეგ განაცხადა, რომ რუსეთის პრეზიდენტ ვლადიმერ პუტინსა და უკრაინის პრეზიდენტ ვოლოდიმირ ზელენსკის შორის შეხვედრა მომდევნო ორ კვირაში გაიმართება.

"დარწმუნებული არ ვარ, რომ პუტინს ეყოფა გამბედაობა, სამიტზე ზელენსკისთან ერთად მივიდეს", — თქვა მერცმა.

ემანუელ მაკრონმა TF1-LCI-ს ექსკლუზიური ინტერვიუში განაცხადა, რომ პუტინისა და ზელენსკის შეხვედრა შესაძლოა ევროპაში გაიმართოს. ის თვლის, რომ უკრაინისა და რუსეთის პრეზიდენტების შეხვედრისთვის შესაფერისი ქვეყანა შვეიცარიაა.

"ასეთი შეხვედრა შეიძლება ევროპაში გაიმართოს. ეს ჰიპოთეზაზე მეტია, ეს კოლექტიური ნებაა", — ამბობს მაკრონი და გვარწმუნებს, რომ ის საფრანგეთში არ ჩატარდება, როგორც ეს 2019 წელს ზელენსკი-პუტინის შეხვედრის დროს მოხდა, არამედ "ნეიტრალურ ქვეყანაში". "შესაძლოა შვეიცარიაში, ჟენევას ვემხრობი" — აცხადებს ის. "ან სხვა ქვეყანაში: ბოლოს ორმხრივი დისკუსიები სტამბოლში (თურქეთი) გაიმართა".

საფრანგეთის პრეზიდენტის ამ განცხადების შემდეგ შვეიცარიის საგარეო საქმეთა მინისტრმა იგნაციო კასისმა გამოცემა SRF-ს განუცხადა, რომ შვეიცარია მზადაა უმასპინძლოს რუსეთ-უკრაინის სამშვიდობო მოლაპარაკებებს.

"შვეიცარია მზადაა უმასპინძლოს რუსეთ-უკრაინის სამშვიდობო მოლაპარაკებებს, რომელსაც ვლადიმერ პუტინი დაესწრება. მზად ვართ ასეთი შეხვედრისთვის და მადლიერები ვართ ჩვენდამი გამოცხადებული ნდობისთვის. ჩვენ ყოველთვის ვაფიქსირებდით მზაობას, მაგრამ ეს, რა თქმა უნდა, დიდი სახელმწიფოების მზაობაზეა დამოკიდებული. ჩვენ შეგვიძლია ასეთი შეხვედრის ჩატარება და ვიცით რა უნდა გაკეთდეს იმისთვის, რომ ის შეუფერხებლად წარიმართოს. ჩვენი განსაკუთრებული როლისა და ჟენევის, როგორც გაეროს ევროპული შტაბ-ბინის როლის გამო, ამის გაკეთება შეგვიძლია მიუხედავად პუტინის წინააღმდეგ გამოცემული დაპატიმრების ორდერისა," — განაცხადა შვეიცარიის საგარეო საქმეთა მინისტრმა.

შეგახსენებთ, ტამპის მიერ უკრაინის პრეზიდენტთან და ევროპელ ლიდერებთან შეხვედრის შემდეგ რუსეთის პრეზიდენტ ვლადიმერ პუტინს ტელეფონით ესაუბრა, რომლის შემდეგაც ტრამპმა საკუთარ სოციალურ ქსელში Truth Social-ში დაწერა, რომ პუტინს, მასსა და პრეზიდენტ ზელენსკის შორის შეხვედრის ორგანიზება დაიწყო.

"შეხვედრის მიმდინარეობისას ჩვენ უკრაინის უსაფრთხოების გარანტიებზე ვიმსჯელეთ, რომელსაც სხვადასხვა ევროპული ქვეყანა შეერთებულ შტატებთან კოორდინაციით უზრუნველყოფს. რუსეთ-უკრაინას შორის მშვიდობის შესაძლებლობით ყველა ძალიან კმაყოფილია. შეხვედრების დასრულების შემდეგ დავურეკე პრეზიდენტ პუტინს და მასსა და პრეზიდენტ ზელენსკის შორის შეხვედრის ორგანიზება დავიწყე, რომელიც ამ დროისთვის დაუზუსტებელ ადგილას გაიმართება. ამის შემდეგ გვექნება სამმხრივი შეხვედრა, რომელსაც ორივე პრეზიდენტი და მე დავესწრებით. კიდევ ერთხელ, ეს იყო ძალიან კარგი ნაბიჯი იმ ომის დასასრულებლად, რომელიც თითქმის 4 წელია, მიმდინარეობს," — დაწერა ტრამპმა.

ასევე იხილეთ: