ნორდიკული და ბალტიის ქვეყნების ლიდერები უკრაინაზე ერთობლივ განცხადებას ავრცელებენ, სადაც წერენ, რომ მიესალმებიან აშშ-ის პრეზიდენტის, დონალდ ტრამპის სიტყვებს ვაშინგტონის "უკრაინის უსაფრთხოების გარანტიებში მონაწილეობის" მზადყოფნის შესახებ.

"სამშვიდობო შეთანხმება მოითხოვს ტრანსატლანტიკური პარტნიორების მხრიდან მტკიცე და კონკრეტულ ვალდებულებებს უკრაინის ნებისმიერი მომავალი აგრესიისგან დასაცავად", — ნათქვამია დოკუმენტში, რომელიც გავრცელდა ტრამპსა და რუსეთის პრეზიდენტ ვლადიმერ პუტინს შორის 15 აგვისტოს, ალასკის შტატის ქალაქ ანკორიჯში გამართული სამიტის შემდეგ.

დოკუმენტის ავტორებმა მოითხოვეს კიევისა და ევროპის ჩართვა ნებისმიერ შემდგომ გადაწყვეტილებაში.

"სამართლიანი და მდგრადი მშვიდობის მისაღწევად, შემდეგი ნაბიჯი უნდა გადაიდგას უკრაინასთან ერთად. მხოლოდ უკრაინას შეუძლია მიიღოს გადაწყვეტილებები მის მომავალთან დაკავშირებით. არც უკრაინის შესახებ გადაწყვეტილებები უკრაინის გარეშე და არც ევროპის შესახებ გადაწყვეტილებები ევროპის გარეშე", — წერენ ლიდერები.

8 ქვეყნის ლიდერი წერს, რომ "პუტინის ნდობა არ შეიძლება და საბოლოოდ, რუსეთია პასუხისმგებელი საერთაშორისო სამართლის უხეში დარღვევებში".

"გამოცდილება აჩვენებს, რომ პუტინის ნდობა არ შეიძლება. საბოლოოდ, რუსეთია პასუხისმგებელი საერთაშორისო სამართლის უხეშ დარღვევებში. რუსეთის აგრესია და მისი იმპერიული ამბიციები არის ამ ომის დაწყების ძირეული მიზეზი", — ნათქვამია განცხადებაში.

ბალტიისპირეთის და სკანდინავიის ქვეყნები რუსეთის აგრესიასა და იმპერიალისტურ ამბიციებს ომის ძირეულ მიზეზებად მიიჩნევენ.

დანიის, ესტონეთის, ფინეთის, ისლანდიის, ლატვიის, ლიეტუვის, ნორვეგიისა და შვედეთის ლიდერების ერთობლივი განცხადება შაბათს, 16 აგვისტოს გამოქვეყნდა.