"ის, რომ ვეტო არსებული რთული ვითარებიდან გამოსავალია, მგონი უკვე ყველა თანხმდება -კონსტიტუციის მიმღები ქართული ოცნებაც", - განაცახადა საქართველოს პრეზიდენტმა, გიორგი მარგველაშვილმა, რომელიც ამ წუთებში საკონსტიტუციო პროცესში ჩართულ 20-მდე ოპოზიციურ პოლიტიკურ პარტიას ხვდება.

შეხვედრა პრეზიდენტის სასახლეში, საკონსტიტუციო ცვლილებებისა და მმართველი გუნდის ინიციატივის განსახილველად შედგა. პარლამენტის თავმჯდომარემ პრეზიდენტს შესთავაზა, რომ ვეტოს უფლება მხოლოდ ბონუსის სისტემის გაუქმებისა და ბლოკების ერთჯერადად შენარჩუნების ნაწილში გამოიყენოს.

გიორგი მარგველაშვილმა ოპოზიციას მიმართა და შექმნილი ვითარება მიმოიხილა:

"სამწუხაროდ, პარლამენტმა მიიღო კონსტიტუცია, ის დოკუმენტი, რომელიც საუკუნეებს უნდა უძლებდეს, მაგრამ საათებსაც ვერ გაუძლო. ჩვენ მოვისმინეთ მმართველი პარტიის შეხედულება იმასთან დაკავშირებით, რომ ჯერ არმიღებული, ხელმოუწერელი დოკუმენტი - საქართველოს კონსტიტუცია, უკვე თურმე ჩასასწორებელია ორ საკითხთან დაკავშირებით. ხაზს ვუსვამ, ეს ორი საკითხი, იმ სიიდანაა, რომელსაც ჩვენ ერთობლივად ვთავაზობდით მათ ჩასასწორებლად. ამასთან, ეს ის ორი საკითხია, რომელიც ვალდებულებად აიღო ქართულმა ოცნებამ, რომ შეასწორებდა".

პრეზიდნეტმა სინანული გამოხატა იმის გამო, რომ შეხვედრას არ ესწრება ქართული ოცნების წარმომადგენელი:

"კიდევ ერთხელ ხაზს ვუსვამ, რომ, როდესაც საუბარია ქვეყნის რთული ვითარებიდან გამოყვანაზე, მე მზად ვარ, ჩემი კარი ყოველთვის ღიაა ამ საკითხზე სათათბიროდ".

გუშინ, 27 სექტემბერს, გიორგი მარგველაშვილმა მმართველ პარტიასა და იმ პოლიტიკურ ძალებს, რომლებიც ჩართულები იყვნენ საკონსტიტუციო პროცესში, პრეზიდენტის სასახლეში კონსულტაციების გამართვა შესთავაზა.

26 სექტემბერს, საქართველოს პარლამენტმა კონსტიტუციის პროექტი მესამე მოსმენით მიიღო. კანონპროექტის მიღებას მხარი 117-მა დეპუტატმა დაუჭირა. კენჭისყრას არ ესწრებოდნენ ნაციონალური მოძრაობისა და ევროპული საქართველოს დეპუტატები.

კონსტიტუციის პროექტის საბოლოო ვერსია უკვე გადაუგზავნეს პრეზიდენტს, რომელმაც დადგენილ ათი დღის ვადაში უნდა მიიღოს გადაწყვეტილება, დაადებს თუ არა ვეტოს ქვეყნის მთავარ კანონს, თუ მის ცალკეულ ნაწილებს.