ერთთვიანი დავის შემდეგ — ბრიტანეთის საქველმოქმედო ორგანიზაციების მარეგულირებელმა საბჭომ — პრინც ჰარის ბულინგის, შევიწროებისა და სექსიზმის ბრალდებები არ წარუდგინა.

როგორც ცნობილია, საქველმოქმედო ორგანიზაციის თავმჯდომარემ — სოფი ჩანდაუკამ — პრინცი ჰარი და ორგანიზაციის სამეურვეო საბჭო "ძალაუფლების ბოროტად გამოყენებაში, ბულინგში, შევიწროებაში, მიზოგინიასა და მიზოგინუარში (ტერმინი, რომელიც შავკანიანი ქალების მიმართ სექსიზმს გულისხმობს)" დაადანაშაულა.

5 აგვისტოს, ინგლისისა და უელსის საქველმოქმედო კომისიამ განაცხადა, რომ საქველმოქმედო ორგანიზაციის ამჟამინდელი თავმჯდომარის, დოქტორ სოფი ჩანდაუკას მიერ გაკეთებული განცხადებების გამოძიების შემდეგ "სენტებაილში" ბულინგის, შევიწროების, მიზოგინიის ან მიზოგინუარის ფაქტი ვერ აღმოაჩინა.

აღსანიშნავია, რომ ბრალდებების გაბათილებასთან ერთად, კომისიამ კონფლიქტში მონაწილე ყველა მხარე გააკრიტიკა, საკითხის "საჯაროდ გაშუქების" გამო და აღნიშნა, რომ შიდა დავების მოგვარების უუნარობამ "სერიოზული გავლენა მოახდინა ორგანიზაციის რეპუტაციაზე და საფრთხე შეუქმნა საზოგადოების ნდობას საქველმოქმედო ორგანიზაციების მიმართ".

მოგვიანებით, ბრალდებაზე კომენტარი პრინცმა ჰარიმ გააკეთა:

"ჩემთვის გასაკვირი არ არის, რომ კომისიამ ვერანაირი დარღვევის ფაქტი აღმოაჩინა, მათ ასევე ვერ აღმოაჩინეს საქველმოქმედო ორგანიზაციაში ფართოდ გავრცელებული ბულინგის, შევიწროების ან მიზოგინიისა და მიზოგინუარის მტკიცებულება, როგორც ამას ამჟამინდელი თავმჯდომარე ამტკიცებს".

ჩანდაუკამ განაცხადა, რომ კომისიის გამოძიება ორგანიზაციისთვის ერთგვარი "გამოცდა" იყო. "ჩვენ არა მხოლოდ მადლიერები ვართ, რომ გადავრჩით, არამედ უფრო ძლიერები, მიზანდასახულები და ამბიციურები", — დასძინა მან.

შეგახსენებთ, რომ პრინცმა ჰარიმ საქველმოქმედო ორგანიზაციაში თანამდებობა ჯერ კიდევ მარტში, ლეზოთოს პრინც სეესოსთან ერთად დატოვა. მას შემდეგ, ჩანდაუკამ ბრიტანულ მედიასთან არაერთ ინტერვიუში თქვა, რომ პრინცის ეს გადაწყვეტილება ორგანიზაციისთვის ზიანის მიყენებას ისახავდა მიზნად. ჰარიმ ეს ბრალდება კატეგორიულად უარყო.

მას შემდეგ, რაც რწმუნებულებმა ორ პრინცთან ერთად თანამდებობები დატოვეს, სოფი ჩანდაუკამ ოთხი ახალი რწმუნებული დანიშნა. საქველმოქმედო კომისიის ჩანაწერებისა და საქველმოქმედო ორგანიზაციის ვებსაიტის ცნობით, ამჟამად ორგანიზაციაში მხოლოდ ორი დარჩა.

რაც შეეხება სოფი ჩანდაუკას, ზიმბაბვეში დაბადებული იურისტი ორგანიზაცია "სენტებაილის" თავმჯდომარედ 2023 წლის ივლისში დაინიშნა, მანამდე კი 2009 წლიდან 2015 წლამდე რწმუნებულის თანამდებობას იკავებდა.

როდესაც ჩანდაუკამ ბრალდებები გაასაჯაროვა, მან თავი ინფორმატორად მოიხსენია და ყოფილი რწმუნებულების შესახებ კომისიას აცნობა. ჩანდაუკამ მათ წინააღმდეგ სარჩელი ინგლისის უმაღლეს სასამართლოშიც შეიტანა.

2006 წელს პრინცების მიერ დედების პატივსაცემად დაარსებული ორგანიზაცია — "სენტებაილი" — სამხრეთ აფრიკაში მცხოვრები ახალგაზრდებისთვის თანხებს აგროვებდა. დაარსებისას საქველმოქმედო ორგანიზაცია მიზნად ისახავდა მსოფლიოს ერთ-ერთ უღარიბეს ქვეყანაში, ლესოთოში, აივ ინფექციით დაზარალებული ადამიანების დახმარებას.