დაპატიმრებული პედაგოგი ნინო დათაშვილი ითხოვს, იმ პროცესს დაესწროს, რომელიც სააპელაციო სასამართლოში, მის ფსიქიატრიულ დაწესებულებაში გადაყვანასთან დაკავშირებით უნდა გაიმართოს. დათაშვილის ადვოკატმა კომენტარი ინტერპრესნიუსთან გააკეთა.

ადვოკატის, თამარ გაბოძის ცნობით, ნინო დათაშვილს საქალაქო სასამართლოში დასწრებოდა იმ სხდომაზე დასწრების შესაძლებლობა არ ჰქონდა, სადაც პროკურატურამ მისი ფსიქიატრიულ დაწესებულებაში გადაყვანასთან დაკავშირებით შუამდგომლობა დააყენა, ამიტომ ახლა მისი პოზიციის დაფიქსირება სურს.

"მას კატეგორიულად სურს, რომ აპელაციის პროცესში მიიღოს მონაწილეობა, რადგან როდესაც საქალაქო სასამართლოში მისი ფსიქიატრიულში მოთავსების საკითხი იხილებოდა, მას სხდომაზე დასწრების საშუალება არ მისცეს", — განაცხადა ადვოკატმა.

ადვოკატმა დათაშვილის ჯანმრთელობის მდგომარეობაზეც ისაუბრა და აღნიშნა, რომ მისი დაცვის ქვეშ მყოფს, მისი ინფორმაციით, ემოციური ფონი იმ ტკივილების გამო აქვს, რომელიც დათაშვილს ახლახან ჩატარებული ოპერაციის გამო აღენიშნება.

"ნინოს დიაგნოზი არის მალთაშუა დისკის თიაქარი, რადიკულიტი — გამწვავებული ტკივილებითა და თანმდევი ემოციური ლაბილობით ანუ პრობლემა არის თიაქარი და თიაქარზე გაკეთებული ოპერაცია. პროკურატურამ კი ხერხემალზე გაკეთებული ოპერაციის გამო, ნინოს ფსიქიატრიული ექსპერტიზა დაუნიშნა. სწორედ ამიტომ არის ეს უკანონობა, რომ აცდენილია სამართლებრივ ნორმებს. ნინოს ოპერაციიდან გამომდინარე აწუხებს ტკივილები, რომელიც უკანასკნელ პერიოდში გამწვავდა და ბუნებრივია ტკივილს ემოცია ახლავს თან.

პროკურატურამ კი, რადგან ადამიანს ტკივილები ჰქონდა, გადაწყვიტა, რომ შეამოწმოს, რამდენად შერაცხადია. პროკურატურა იყენებს ყველაზე უკანონო მეთოდს. მეორე უბედურებაა, რომ სასამართლო ამის სივრცეს აძლევს. მოსამართლეს მსხვერპლის მიმართ არცერთი კითხვა არ დაუსვამს, პროკურატურის შუამდგომლობიდან გამომდინარე.

ნინოს წელის ტკივილი გამძაფრებული აქვს. მისი დიაგნოზი არის — "თიაქარი". ეს კი ისეთი დიაგნოზია, რომელიც პერიოდულად მწვავდება. დღეს 2 ინექცია ჰქონდა გაკეთებული - ანთების საწინააღმდეგო და გამაყუჩებელი. კონსულტაციის დროს უჭირდა ჯდომა. ექიმისთვის არაერთხელ გვაქვს მიწერილი, რომ უზრუნველყოფილიყო ნინოს ყველა საჭირო სამედიცინო სერვისი. გასაგებია და მარტივია, რომ ადამიანი, რომელიც დაკავებამდეც იყო სამედიცინო სერვისის საჭიროებით, ჰქონდეს შესაბამისი გარემო და არაინკლუზიურ გარემოში, ციხის პირობებში ვერ მოხდება ნორმალური მკურნალობა და ვერ მოხდება ნინოს მდგომარეობის გაუმჯობესება, პირიქით გაუარესდება.

ნინო მხნედ არის და საზოგადოებას სოლიდარობისთვის მადლობას უხდის. ცდილობს, რომ ახალი უკანონობა და ყველაზე ამორალური ბრძოლა და თავდასხმა გადაიტანოს, რომელიც მის წინააღმდეგ მიმდინარეობს.

მიზანი კი ნინოს დისკრედიტაცია და უკანონო პატიმრობის გახანგრძლივებაა", — განაცხადა თამარ გაბოძემ.

ცნობისთვის, სასამართლომ ნინო დათაშვილის, დაკავებული აქტივისტისა და მასწავლებლის, იძულებით ფსიქიატრიულ ექსპერტიზაზე პროკურატურის მოთხოვნა დააკმაყოფილა; იძულებითი ექსპერტიზა ბრალდებულის ფსიქიატრიულ დაწესებულებაში იძულებით გადაყვანას მოიცავს. პროკურატურამ ამის საფუძვლად 2019 წელს გაკეთებული სამედიცინო ჩანაწერი დაასახელა, რომელშიც ხერხემლის დაავადების თანმდევი "ემოციური ლაბილობა" იყო ნახსენები.

ნინო დათაშვილი "საჯარო მოსამსახურეზე განხორციელებული თავდასხმის ბრალდებით" 20 ივნისს დააკავეს. მანდატურზე თავდასხმის ფაქტზე ბრალდებულ ნინო დათაშვილს აღკვეთის ღონისძიების სახით პატიმრობა 21 ივლისს შეეფარდა. აქტივისტს სისხლის სამართლის კოდექსის 353-ე სეკუნდა მუხლის მე-3 ნაწილით ედავებიან, რაც 4-დან 7 წლამდე ვადით თავისუფლების აღკვეთას ითვალისწინებს.