"მას გადაადგილება უჭირს, წელი სტკივა და ჯანმრთელობის კონკრეტული საჭიროებები აქვს, რაც სამედიცინო მტკიცებულებებით დადასტურებულია," — ამის შესახებ დაპატიმრებული პედაგოგის, ნინო დათაშვილის ადვოკატმა, თამარ გაბოძემ გუშინ, 16 ივლისს ისაუბრა.

დღეს ადვოკატმა "ტვ პირველთან" საუბრისას განაცხადა, რომ ნინო დათაშვილს ხერხემალზე ოპერაცია აქვს გაკეთებული რაც, მისი თქმით, პროკურატურისთვისაც და სასამართლოსთვისაც ცნობილი იყო, ვიდრე პატიმრობის განაჩენი გამოცხადდებოდა.

ადვოკატი ითხოვს, რომ ნინო დათაშვილი საქალაქო პროფილის სამედიცინო დაწესებულებაში გადაიყვანონ.

"მას გადაადგილება უჭირს, წელი სტკივა და ჯანმრთელობის კონკრეტული საჭიროებები აქვს, რაც სამედიცინო მტკიცებულებებით დადასტურებულია. N5 პენიტენციურ დაწესებულებაში ეს ინფორმაცია უკვე აქვთ, რადგან ჩვენ ნინოს სამედიცინო დოკუმენტები მათ გადავეცით.

ვითხოვთ, რომ ნინო საქალაქო პროფილის სამედიცინო დაწესებულებაში გადაიყვანონ და ყველა საჭირო კვლევა ჩაუტარონ. ამ დრომდე, ჩვენს მოთხოვნებს არანაირი პროგრესი არ აქვს დაკავების შემდეგ, პირველივე პროცესზე პროკურატურისთვისაც და სასამართლოსთვისაც ცნობილი იყო, რომ ნინოს საპატიმროში ყოფნა მის ჯანმრთელობის მდგომარეობას გააუარესებდა და ამის შესახებ დოკუმენტებიც დართული იყო", — თქვა დათაშვილის ადვოკატმა გუშინ, 16 ივლისს.

თამარ გაბოძემ ტელეკომპანია "პირველის" ეთერში აღნიშნა, რომ მისი დაცვის ქვეშ მყოფის მდგომარეობა უარესდება. ადვოკატის თქმით, დათაშვილს შესაბამისი სერვისი არ მიეწოდება.

"ნინოს დაკავების პროცესში უკვე ცნობილი იყო პროკურატურისთვისაც და სასამართლოსთვისაც, რომელმაც შეუფარდა პატიმრობა, რომ ნინოს ჰქონდა ჯანმრთელობის პრობლემები, სჭირდებოდა გადაუდებელი კვლევები, მას ჰქონდა ოპერაცია გაკეთებული ხერხემალზე. კვლავ ჰქონდა ქირურგიული ჩარევის საჭიროება. ეს ყველაფერი ჩვენ გავაჟღერეთ დადასტურებულად სამედიცინო მტკიცებულებებით სასამართლო პროცესზე, თუმცა სასამართლომ არ გათვალისწინა ეს, როდესაც უფარდებდა ნინოს პატიმრობას.

სააპელაციო სასამართლოში როდესაც გავასაჩივრეთ სასამართლოს გადაწყვეტილება პატიმრობის შესახებ, იქ ვუთითებდით, რომ ციხის პირობებში ნინოს ჯანმრთელობის მდგომარეობა დამძიმდებოდა, რადგან ბუნებრივია, როდესაც ადამიანს აქვს ჯანმრთელობის პრობლემა და არ ეწოდება შესაბამისი სერვისი, მისი ჯანმრთელობის მდგომარეობა უარესდება" — განაცხადა დღეს, 17 ივლისს ნინო დათაშვილის ადვოკატმა.

დაპატიმრებული პედაგოგი 2025 წლის 27 ივნისს, 11 და 16 ივლისს, სახალხო დამცველის რწმუნებულებმა მოინახულეს. მათი ცნობით, "ნინო დათაშვილმა სახალხო დამცველის რწმუნებულებს 11 ივლისს მოსთხოვა, მის შესახებ მიწოდებული ინფორმაცია არ გამხდარიყო საჯარო. შესაბამისად, აპარატს არ გაუსაჯაროებია განსაკუთრებული კატეგორიის პერსონალური ინფორმაცია ნინო დათაშვილის ჯანმრთელობის მდგომარეობის შესახებ".

შეგახსენებთ, ნინო დათაშვილი "საჯარო მოსამსახურეზე განხორციელებული თავდასხმის ბრალდებით" 20 ივნისს დააკავეს. მანდატურზე თავდასხმის ფაქტზე ბრალდებულ ნინო დათაშვილს აღკვეთის ღონისძიების სახით პატიმრობა 21 ივლისს შეეფარდა. აქტივისტს სისხლის სამართლის კოდექსის 353-ე სეკუნდა მუხლის მე-3 ნაწილით ედავებიან, რაც 4-დან 7 წლამდე ვადით თავისუფლების აღკვეთას ითვალისწინებს.

ასევე იხილეთ: