"პარტნიორობა ადამიანის უფლებებისთვის" (PHR) იურისტებმა ბრიფინგზე განაცხადეს, რომ დაკავებული აქტივისტი და მასწავლებელი ნინო დათაშვილის ფსიქიატრიულ დაწესებულებაში იძულებით გადაყვანაზე სასამართლომ პროკურატურის მოთხოვნა დააკმაყოფილა.

ორგანიზაციის განცხადებით, პროკურატურის შუამდგომლობა ეფუძნება ნინო დათაშვილის მძიმე ხერხემლის დიაგნოზის და სხვა ჯანმრთელობის პრობლემებს, რის შემდეგაც აქტივისტს 2019 წელს ემოციური ლაბილობა აღენიშნებოდა. ორგანიზაცია ხაზს უსვამს, რომ არანაირი მოცემულობა არ არსებობდა დათაშვილის ფსიქიატრიულ დაწესებულებაში გადაყვანისა და ამ პროცესების შესახებ ბრალდებულს არანაირი ინფორმაცია არ ჰქონდა.

"პროკურატურამ მიმართა ბრძოლის ახალ მეთოდს აქტივისტების წინააღმდეგ და კონკრეტულად ნინო დათაშვილის შემთხვევაში, სრულიად უსაფუძვლოდ და უკანონოდ მოითხოვა სასამართლო ფსიქიატრიული ექსპერტიზის ჩატარება. რაც იმას ნიშნავს, რომ პროკურატურამ მოინდომა ნინო დათაშვილისთვის შერაცხადობის საკითხის გამორკვევა ყველანაირი საფუძვლის გარეშე. სასამართლომ დააკმაყოფილა ეს შუამდგომლობა, სასამართლომ არ მისცა ნინო დათაშვილს პროცესში მონაწილეობის უფლება, რადგან მას არ ჰქონდა ინფორმაცია, რა პროცესი განიხილებოდა მის წინააღმდეგ. სასამართლომ განაცხადა, რომ თუ ნინო დათაშვილი იქნება წინააღმდეგი ექსპერტიზის ჩატარებაზე, გამოყენებული იქნას იძულების პროპორციული ღონისძიებები, რაც იმას ნიშნავს, რომ სასამართლომ ნინო დათაშვილის ფსიქიატრიულ დაწესებულებაში გადაყვანის ნებართვა გასცა.

პროკურატურის შეუმამდგომლობა ეფუძნება სამედიცინო ჩანაწერებს, რომელიც დაცვის მხარემ პირველი წარდგენის სხდომაზე გაუცვალა პროკურატურას, სადაც მითითებულია, რომ ნინო დათაშვილს აქვს ძალიან მძიმე ხერხემლის დიაგნოზი. მას აქვს მალთაშუა დაზიანება, თიაქარი, რადიკულიტი და თანმხლებ სიმპტომად მითითებულია ემოციური ლაბილობა, რაც იმას ნიშნავს, რომ ნინოს ჯანმრთელობიდან გამომდინარე, ნინოს აღენიშნებოდა 2019 წელს აღენიშნებოდა ემოციური ლაბილობა, ტირილი, ემოციის მატება, რაც არცერთ შემთხვევაში არ არის დიაგნოზი. ეს არის სიმპტომი და თან ახლავს ნინოს ჯანმრთელობის მძიმე მდგომარეობას, რომელიც პროკურატურისთვის ცნობილი იყო," — განაცხადა იურისტმა.

ორგანიზაციის განცხადებით, პროკურატურამ ამ გადაწყვეტილებით ნინო დათაშვილს უკანონო პატიმრობა 20 დღით გაუხანგრძლივა ფსიქიატრიულ დაწესებულებაში და ეს ქმედება მიზნად აქტივისტის დისკრედიტაციას ისახავს

"პროკურატურამ უკანონოდ მოითხოვა ფსიქიატრიულ დაწესებულებაში მოთავსება 20 დღის ვადით, რაც იმას ნიშნავს ნინოს პატიმრობა გაახანგრძლივა უკანონოდ ამჯერად ფსიქიატრიულ დაწესებულებაში. აღნიშნული გადაწყვეტილება მიზნად ისახავს ნინოდ დისკრედიტაციას და სტიგმატიზაციას, მათი მიზანია ნინო დათაშვილი ჩამოაშორონ აქტივიზმს," — განაცხადა იურისტმა.

შეგახსენებთ, ნინო დათაშვილი "საჯარო მოსამსახურეზე განხორციელებული თავდასხმის ბრალდებით" 20 ივნისს დააკავეს. მანდატურზე თავდასხმის ფაქტზე ბრალდებულ ნინო დათაშვილს აღკვეთის ღონისძიების სახით პატიმრობა 21 ივლისს შეეფარდა. აქტივისტს სისხლის სამართლის კოდექსის 353-ე სეკუნდა მუხლის მე-3 ნაწილით ედავებიან, რაც 4-დან 7 წლამდე ვადით თავისუფლების აღკვეთას ითვალისწინებს.