მოემზადეთ — ჯუდისა და ნიკის ლეგენდარული დუეტი ეკრანებზე ბრუნდება, ყველასთვის საყვარელი ანიმაციური ფილმი ზოოტოპია კი ცხრა წლის შემდეგ გრძელდება!

ზოოტოპია 2-ის ტრეილერი დისნეიმ სულ ახლახან გამოაქვეყნა. მონატრებულ გმირებთან ერთად, ახალ ფილმში ახალ სახეებსაც ვიხილავთ. მაგალითად, გავიცნობთ ზოოტოპიის ახალ მობინადრეს, გველ გერის, რომელიც ქალაქის მცხოვრებლებს შიშის ზარს სცემს. პერსონაჟს ოსკაროსანი კი ჰუი ქუანი ახმოვანებს. აი, ჯუდისა და ნიკს კი კვლავაც ჯინიფერ გუდვინი და ჯეისონ ბეიტმენი ასახიერებენ. რასაკვირველია, ისევ შევხვდებით გაზელს, რომელსაც კვლავაც შაკირა გაახმოვანებს და მეტიც — ახალ სიმღერას შემოგვთავაზებს!

ტრეილერში ვხედავთ, რომ ზოოტოპიის პოლიციის ოფიცრები წყვილების თერაპევტ დოქტორ ფაზბისთან არიან სეანსზე, რათა ერთად მუშაობა შეძლონ. ეს კი ძალზედ მნიშვნელოვანი საკითხია, რადგან ჯუდისა და ნიკს მნიშვნელოვანი მისია ეკისრებათ: გველი გერის ადგილსამყოფელი უნდა გაარკვიონ. ამ დავალების შესრულებისას, წყვილი ქალაქის უცნობ უბნებში აღმოჩნდება და კიდევ რამდენიმე ახალ პერსონაჟს შეხვდება.

ზოოტოპია, რომელიც 2016 წელს გამოვიდა, წინა ათწლეულის ერთ-ერთი ყველაზე პოპულარული ანიმაციური ფილმი გახლავთ. ფილმს დიდი კომერციული წარმატება ხვდა წილად — მსოფლიოში $1 მილიარდზე მეტი გამოიმუშავა და იმ წლის მეოთხე ყველაზე მაღალშემოსავლიანი კინონამუშევარი გახდა. არაერთ სხვა ჯილდოსთან ერთად, ზოოტოპიამ ოსკარიც დაიმსახურა საუკეთესო ანიმაციური ფილმის ნომინაციაში, ამერიკის კინოინსტიტუტმა კი იგი 2016 წლის 10 საუკეთესო ფილმს შორის დაასახელა. ფილმს მოჰყვა სპინ-ოფ სერიალი ზოოტოპია+, რომლის პრემიერაც დისნეი პლუსის არხზე 2022 წელს შედგა.

რაც შეეხება ზოოტოპია 2-ს, მაყურებელი მას 26 ნოემბერს იხილავს.