თბილისის ქუჩებში გაკრული განცხადებების შემდეგ, რომელიც მსურველებს ხველების საიდუმლო ენის შესწავლას სთავაზობს, ინტერნეტში ფარული აუდიო ჩანაწერი გამოჩნდა, რომელშიც ამ საიდუმლო ენაზე მოსაუბრე ადამიანები ჯგუფურ ქურდობას გეგმავენ.

შეიძლება ითქვას, რომ ჯგუფური ქურდობა უკვე შედგა კიდეც, რადგან ჩანაწერის თარგმანში, რომელიც ხველების კულუარებიდან მოგვაწოდეს, აშკარად ვისმენთ, რომ ამ ადამიანებმა ძალიან ბევრი კატალიზატორი მოიპარეს და ძალიან უხარიათ.

საუბრის ბოლოს ვკითხულობთ, ხოლო ვინც ხველების საიდუმლო ენა იცის, ისინი ისმენენ, რომ ყველაფერი ჯერ კიდევ წინაა და სულაც არ დამთავრებულა.

ვინ არის ეს ხალხი, რა უნდათ და რაში სჭირდებათ ჩვენი კატალიზატორები, რომლებიც არც კი ვიცით რა არის და იმედი გვაქვს ჩვენთვისაც არ მოუპარავთ, არ ვიცით! როგორც ხველებასთან დაახლოებულმა სანდო წყარომ გაგვანდო, ყველაფერი ძალიან მალე გაირკვევა.