აჭარის უმაღლესმა საბჭომ, მთავრობის თავმჯდომარედ სანქცირებული სულხან თამაზაშვილი დაამტკიცა. რის შემდეგაც ირაკლი კობახიძემ და მიხეილ ყაველაშვილმა აჭარის ავტონომიური რესპუბლიკის მთავრობის სანქცირებული თავმჯდომარე ადგილობრივი ხელისუფლების წარმომადგენლებს წარუდგინეს.

"აჭარის ტელევიზიის" ცნობით, თამაზაშვილსა და მის მიერ წარმოდგენილ მინისტრთა კაბინეტს მხარი 12-მა დეპუტატმა დაუჭირა. აჭარის მინისტრთა კაბინეტის შემადგენლობა უცვლელი დარჩა. მანამდე სულხან თამაზაშვილი თბილისის პოლიციის დეპარტამენტის დირექტორი იყო.

ირაკლი კობახიძემ გაწეული საქმიანობისთვის თორნიკე რიჟვაძეს მადლობა გადაუხადა და აჭარის ავტონომიური რესპუბლიკის მთავრობის ახალ თავმჯდომარე სულხან თამაზაშვილს წარმატებები უსურვა.

"დღეს დამტკიცდა აჭარის ავტონომიური რესპუბლიკის მთავრობის ახალი თავმჯდომარე. მინდა, ბატონ სულხანს მივულოცო ეს ახალი, ძალიან საპასუხისმგებლო და მნიშვნელოვანი პოზიცია. ბატონი სულხანი არის გამორჩეული პროფესიონალი, რომელსაც აქვს განსაკუთრებული გამოცდილება, ძირითადად სამართალდამცავ სტრუქტურებში. სამართალდამცავ სტრუქტურებში მუშაობა განსაკუთრებულ გამოცდილებას აძლევს ადამიანს, რაც ძალიან მნიშვნელოვანია მენეჯერული საქმიანობის განხორციელებისთვის და, ზოგადად, მართვისთვის. ჩვენ ვართ ყველანაირად დარწმუნებული, რომ ბატონი სულხანი იქნება მთავრობის წარმატებული თავმჯდომარე", — აღნიშნა ირაკლი კობახიძემ.