ამერიკის შეერთებული შტატების პრეზიდენტმა დონალდ ტრამპმა განაცხადა, რომ უკრაინის პრეზიდენტმა ვოლოდიმირ ზელენსკიმ მოსკოვს არ უნდა დაარტყას. მისივე თქმით, რუსეთის პრეზიდენტი ვლადიმერ პუტინი ცეცხლის შეწყვეტის შეთანხმებას 50-დღიან ვადაში უნდა დათანხმდეს, წინააღმდეგ შემთხვევაში მას სანქციები დაეკისრება. ამის შესახებ ინფორმაციას Reuters ავრცელებს.

დონალდ ტრამპის ეს განცხადება The Financial Times-ის მიერ გავრცელებულ ინფორმაციას მოჰყვა, რომელიც, წყაროებზე დაყრდნობით, იუწყებოდა, რომ ტრამპი პირად საუბარში უკრაინას მოუწოდებდა გააქტიურებულიყო რუსეთის სიღრმეში მდებარე ტერიტორიებზე შეტევაში. გამოცემის ცნობით, ტრამპმა ზელენსკის ჰკითხა, შეძლებდა თუ არა მოსკოვის დაბომბვას იმ შემთხვევაში, თუ აშშ მისცემდა შორ მანძილზე მოქმედ იარაღს.

"არა, არ უნდა მიიტანოს იერიში მოსკოვზე," — უპასუხა ტრამპმა ჟურნალისტებს, როდესაც მათ უკრაინის მიერ მოსკოვზე თავდასხმასთან დაკავშირებით დაუსვეს კითხვა.

დონალდ ტრამპმა ორშაბათს გამოაცხადა, რომ რუსეთის წინააღმდეგ უკრაინაში სამი წელის განმავლობაში მიმდინარე ომის გამო პოზიციას ამკაცრებს და უკრაინისთვის ახალი სარაკეტო სისტემებისა და სხვა შეიარაღების მიწოდება დააანონსა. შეთანხმების მისაღწევად, მან რუსეთს 50 დღე მისცა. წინააღმდეგ შემთხვევაში სანქციები ძალაში შევა.

Reuters-ის ინფორმაციით, ტრამპის ამ განცხადების შემდეგ ევროპელი ოფიციალური პირები ცდილობენ გაარკვიონ, როგორ მოახერხონ ტრამპის გეგმის რეალიზება და უზრუნველყონ, უკრაინისთვის საჭირო იარაღის მიწოდება.

მოგვიანებით, ტრამპმა ჟურნალისტებს უთხრა, რომ ზოგიერთი Patriot-ის რაკეტა უკვე გზაშია უკრაინისკენ:

"ისინი უკვე გზაშია", — განუცხადა ტრამპმა ჟურნალისტებს მერილენდის შტატის ქალაქ ენდრიუსის ერთობლივ ბაზაზე, როდესაც პატრიოტის რაკეტებსა და სხვა შეიარაღებაზე ჰკითხეს.

"ისინი გერმანიიდან მოდიან და ყველა შემთხვევაში, შეერთებული შტატები სრულ ანაზღაურებას მიიღებს", — თქვა ტრამპმა.

ტრამპის თქმით, პუტინთან ამ განცხადების შემდეგ ჯერ არ უსაუბრია, მაგრამ აღნიშნა, რომ შეთანხმების მიღწევას შესაძლოა 50 დღეც არ დასჭირდეს.

როდესაც მას ჰკითხეს, ახლა უკრაინის მხარესაა თუ არა, ტრამპმა უპასუხა: "არავისი მხარე არ ვარ", შემდეგ კი დაამატა, რომ "კაცობრიობის მხარესაა", რადგან "მკვლელობები უნდა შეწყდეს".

ამერიკის შეერთებული შტატების პრეზიდენტმა ხაზგასმით აღნიშნა, რომ სანქციები და ტარიფები შეეხება იმ ქვეყნებსაც, რომლებიც რუსულ ნავთობს ყიდულობენ. დონალდ ტრამპს შეთანხმების მისაღწევად მოლაპარაკებების დაგეგმვასთან დაკავშირებით ინფორმაცია ჯერ არ გაუვრცელებია.

"თუ 50-ე დღის ბოლოს შეთანხმება არ გვექნება, ეს ძალიან ცუდი იქნება", – თქვა მან.