აშშ-ის პრეზიდენტმა, დონალდ ტრამპმა განაცხადა, რომ უკრაინაში Patriot-ის ტიპის საზენიტო-სარაკეტო სისტემებს გაგზავნის და ამბობს, რომ კიევს ისინი სჭირდება, რადგან რუსეთის ლიდერი ვლადიმერ პუტინი „კარგად ლაპარაკობს, მაგრამ საღამოს ყველას ბომბავს“. ამის შესახებ Reuters წერს.

"ჩვენ მათ Patriot-ებს გავუგზავნით, რომლებიც მათ უკიდურესად სჭირდებათ, რადგან პუტინმა ბევრი ადამიანი გააკვირვა. ის კარგად ლაპარაკობს და საღამოს ყველას ბომბავს. თუმცა, ამაში პატარა პრობლემაა. მე ეს არ მომწონს...

ჩვენ ძირითადად მათ სხვადასხვა ძალიან დახვეწილი სამხედრო აღჭურვილობის ერთეულებს გავუგზავნით. ისინი 100%-ით გადაგვიხდიან და ეს არის ის, რაც ჩვენ გვინდა", ­ — განუცხადა ტრამპმა ჟურნალისტებს ვაშინგტონთან ახლოს, ენდრიუსის საჰაერო ძალების ბაზაზე.

ტრამპმა არ დააკონკრეტა, რამდენი Patriot-ის გაგზავნას გეგმავს უკრაინაში, მაგრამ თქვა, რომ ევროკავშირი აშშ-ს მათ ხარჯებს აუნაზღაურებს.

ის უკრაინისა და სხვა საკითხების განსახილველად მიმდინარე კვირაში NATO-ს გენერალურ მდივანს, მარკ რუტეს შეხვდება.

ჰააგაში NATO-ს სამიტის შემდეგ გამართულ პრესკონფერენციაზე აშშ-ის პრეზიდენტმა დონალდ ტრამპმა განაცხადა, რომ გადაამოწმებდა, შეძლებდა თუ არა უკრაინისთვის დამატებითი Patriot-ის საჰაერო თავდაცვის სისტემების მიწოდებას, თუმცა ხაზგასმით აღნიშნა, რომ ისინი აშშ-საც სჭირდება. ტრამპმა ეს უკრაინელი ჟურნალისტის კითხვაზე პასუხის გაცემისას განაცხადა, მზად იყო თუ არა აშშ Patriot-ის საჰაერო თავდაცვის სისტემების მიყიდვისთვის. აშშ-ის პრეზიდენტმა თანაუგრძნო კორესპონდენტს, რომლის ქმარიც ფრონტზე იბრძოდა.

The Guardian-მა გაავრცელა ინფორმაცია, რომ შეერთებულ შტატებს პენტაგონის ყველა სამხედრო გეგმისთვის საჭირო Patriot-ის რაკეტების მხოლოდ დაახლოებით 25% აქვს, მას შემდეგ, რაც ბოლო თვეებში ახლო აღმოსავლეთში მარაგი ამოიწურა და ამიტომ გადაწყვიტა უკრაინისთვის თავდაცვითი იარაღის მიწოდების შეჩერება.