უკრაინელები სოციალურ მედიაში მიმების სერიებს უძღვნიან მელანია ტრამპს, მას შემდეგ, რაც დონალდ ტრამპმა განაცხადა, რომ პირველმა ლედიმ გავლენა იქონია რუსეთის მიმართ მისი შეხედულებების ცვლილებაში. ამის შესახებ The Guardian წერს.

ორშაბათს თეთრ სახლში NATO-ს გენერალურ მდივანთან, მარკ რუტესთან შეხვედრაზე ტრამპმა განაცხადა, რომ მისმა მეუღლემ არსებითი როლი ითამაშა იმაში დასარწმუნებლად, რომ ვლადიმერ პუტინი ორპირია.

"როდესაც სახლში მივდივარ, პირველ ლედის ვეუბნები: დღეს ვლადიმერს ვესაუბრე. მშვენიერი საუბარი გვქონდა. ის ამბობს: მართლა? ახლახან კიდევ ერთი ქალაქი დაბომბეს", — ამბობს ტრამპი.

გამოცემა წერს, რომ სლოვენიაში დაბადებული მელანია ტრამპი, რომელიც იუგოსლავიაში გაიზარდა, ადრე უკრაინის უფრო დიდი მხარდამჭერი ჩანდა, ვიდრე სკეპტიკურად განწყობილი აშშ-ის პრეზიდენტი, რომელმაც წელს თებერვალში ვოლოდიმირ ზელენსკის "დიქტატორი" უწოდა. 2022 წლის რუსეთის უკრაინაში სრულმასშტაბიანი შეჭრიდან მალევე, მან სოციალური მედიის მიმდევრებს მოუწოდა, წითელ ჯვარში შემოწირულებები შეეგროვებინათ და თქვა, რომ გულდასაწყვეტი და საშინელებაა უდანაშაულო ადამიანების ტანჯვის ყურება.

ორშაბათს ტრამპის ოვალურ კაბინეტში გაკეთებული კომენტარების შემდეგ, სოციალური მედიის ერთ-ერთმა მომხმარებელმა გამოაქვეყნა აგენტი მელანია ტრამპენკოს ფოტო, რომელსაც აცვია უკრაინის ემბლემიანი პიჯაკი. მისი სახე ნახევრად დაფარულია დიდი ქუდით, რაც ქმნის შთაბეჭდილებას, რომ ის ფარულად მუშაობს თეთრ სახლში, კიევის სასარგებლოდ.

ჟურნალმა Business in Ukraine-მ აღნიშნა, რომ "სოციალურ მედიაში დიდ სიყვარულს გამოხატავენ მელანია ტრამპის მიმართ" მას შემდეგ, რაც გავრცელდა ინფორმაცია, რომ აშშ უკრაინაში Patriot-ის საჰაერო თავდაცვის სისტემებს გაგზავნის.