თბილისის ბაგა-ბაღების მართვის სააგენტოს დირექტორმა, თემურ თორდინავას განცხადებით, მისივე გადაწყვეტილებით, 206-ე საბავშვო ბაღის დირექტორსა და აღმზრდელებს უფლებამოსილება შეუჩერდათ. ამავე პირებისთვის უფლებამოსილების შეჩერების მოთხვონით სააგენტოს თბილისის მერიამაც მიმართა.

დღეს, 25 სექტემბერს, ზემო ფონიჭალაში, ბაგა-ბაღის შენობის მეორე სართულიდან სამი წლის ბავშვი გადმოვარდა.

თემურ თორდინავას თქმით, მომხდარის მიზეზი ჯგუფის აღმზრდელისა და აღმზრდელის თანაშემწის უყურადღებობაა:

"აუცილებელია საბავშვო ბაღში იყოს მაღალი კონტროლი ბავშვების უსაფრთხოებაზე, სააგენტოს მხრიდან, კონკრეტულად ჩემი მხრიდან იქნა მიღებული გადაწყვეტილება და თანამდებობიდან გათავისუფლდა 206-ე საბავშვო ბაღის დირექტორი. გარდა ამისა, თანამდებობიდან გათავისუფლდებიან დღესვე აღმზრდელი და აღმზრდელის თანაშემწე".

შინაგან საქმეთა სამინისტროს მიერ On.ge-სთვის მიწოდებული ინფორმაციით, ბავშვის სიცოცხლეს საფრთხე არ ემუქრება. იგი ამჟამად ექიმების მეთვალყურეობის ქვეშაა.

საქმეზე გამოძიება კი სისხლის სამართლის კოდექსის 124-ე მუხლით დაიწყეს. ამ მუხლით, ჯანმრთელობის ნაკლებად მძიმე ან მძიმე დაზიანება გაუფრთხილებლობით ისჯება ჯარიმით ან გამასწორებელი სამუშაოთი ვადით ორ წლამდე.