აშშ-ის პრეზიდენტმა, დონალდ ტრამპმა გუშინ, 1-ელ ივლისს ჟურნალისტებს განუცხადა, რომ მის ადმინისტრაციას მოუწევს, განიხილოს ამერიკელი მილიარდერის, ილონ მასკის დეპორტაციის საკითხი მას შემდეგ, რაც მან პრეზიდენტთან ბიუჯეტის ხარჯების კანონპროექტთან დაკავშირებით დაპირისპირება ხელახლა წამოიწყო.

ინფორმაციას ABC News ავრცელებს.

ამას გარდა, ტრამპი მილიარდერს დაემუქრა, რომ DOGE-ს, მთავრობის ეფექტიანობის დეპარტამენტის მიუგზავნის მისი საქმიანობის შესასწავლად, რომელსაც მასკი თავად ხელმძღვანელობდა.

ილონ მასკმა შაბათსა და კვირას რამდენიმე პოსტი გამოაქვეყნა სოციალურ ქსელ X-ზე, სადაც რესპუბლიკელები ბიუჯეტის შესახებ ე.წ. "დიდი, ლამაზი კანონპროექტის" გამო გააკრიტიკა. მისი თქმით, ის საგარეო ვალის ზრდას გამოიწვევს.

"ფაქტია, რომ ამ კანონპროექტის გიჟური ხარჯებით, რომელიც სახელმწიფო ვალს რეკორდულად ხუთი ტრილიონ დოლარამდე ზრდის, ჩვენ ერთპარტიულ ქვეყანაში ვცხოვრობთ, "ღორის პარტია!" — დაწერა მასკმა ორშაბათს.

ტრამპმა სამშაბათს, დილით, მასკს Truth Social-ზე პოსტით უპასუხა, სადაც განაცხადა, რომ Tesla-ს აღმასრულებელი დირექტორს, "ილონს მოუწევდა მაღაზიის დახურვა და სამხრეთ აფრიკაში, სახლში დაბრუნება". ცნობისათვის, ილონ მასკი სამხრეთ აფრიკის მოქალაქეა, შემდეგ კი ამერიკის მოქალაქეობა აქვს მიღებული ნატურალიზაციის გზით.

დილით, ჟურნალისტების კითხვაზე, აპირებდა თუ არა მასკის დეპორტაციას, ტრამპმა უპასუხა: "ამ საკითხს უნდა გადავხედოთ".

"შესაძლოა, ილონს DOGE მივუგზანოთ", — თქვა მან და იგულისხმა მთავრობის ეფექტურობის დეპარტამენტი, რომელსაც მასკი ადრე ხელმძღვანელობდა.

მედია წერს, რომ ტრამპმა მასკის კრიტიკა დღის ბოლოს, ფლორიდაში ვიზიტის დროსაც განაგრძო.

"თუ DOGE მასკს მიხედავს, დიდ ფულს დავზოგავთ", — განუცხადა მან ჟურნალისტებს.

ორშაბათს ილონ მასკმა დაწერს, რომ პრაიმერის დროს კანონპროექტის მხარდამჭერ ნებისმიერ რესპუბლიკელის კონკურენტს დააფინანსებდა, თუ ეს დედამიწაზე მისი უკანასკნელი ქმედება იქნებოდა.

შეგახსენებთ, რომ 7 ივნისს NBC News-თან საუბრისას ტრამპმა განაცხადა, რომ მასკს პასუხისგება მოუწევს, თუ დემოკრატი კანდიდატების დაფინანსებას გადაწყვეტს.

ცნობისთვის, მასკმა თეთრ სახლში თანამდებობა ახლახან დატოვა და აქტიური კრიტიკოსი გახდა იმ რესპუბლიკელების, რომლებმაც ხარჯების შესახებ "დიდი და ლამაზი" კანონპროექტი დაამტკიცეს.

"სირცხვილი მათ, ვინც მას მისცა ხმა: თქვენ იცით, რომ არასწორად მოიქეცით. თქვენ ეს იცით" — აცხადებდა მასკი.