ქობულეთის რაიონში, სოფელ ქობულეთში, გვიან ღამით, ძლიერი წვიმის გამო ღვარცოფი მოვარდა და მეწყერი ჩამოწვა. ამ მიზეზით ორი ოჯახის ევაკუაცია გახდა საჭირო. ამის შესახებ ინფორმაცია On.ge-ს საგანგებო სიტუაციების მართვის სააგენტოში განუცხადეს.

მათივე ინფორმაციით, სოფელ ქობულეთში გზაზე ჩამოწოლილ მიწის მასაში მსუბუქი ავტომობილი მოჰყვა. საგანგებო სიტუაციების მართვის თანამშრომლებმა ავტომობილში მყოფი ოჯახის ოთხივე წევრი, მათ შორის ორი მცირეწლოვანი გადაარჩინეს.

საზოგადოებრივი მაუწყებლის აჭარის ტელევიზიის ინფორმაციით, ამავე რაიონში, სოფელ სამებაში გარე სამყაროს რამდენიმე ოჯახი მოწყდა, მეწყერის გამო კი მათთან მიახლოება რთულდება.

ქობულეთის გამგებელის მოადგილე აჭარის ტელევიზიასთან საუბრისას ამბობს, რომ მეწყრულმა პროცესებმა პრობლემა 11 ოჯახს შეუქმნა.