დემნა გვასალიამ, ქართველმა დიზაინერმა, რომელიც ახლახან დაინიშნა Gucci-ს კრეატიულ ხელმძღვანელად, ჟურნალ Vogue-თან მოდის სახლ ბალენსიაგაში გატარებულ 10 წელზე ისაუბრა. როგორც ვიგებთ, მისი წარმატების გზა სულაც არ ყოფილა ია-ვარდით მოფენილი — თავიდან მას სტაჟიორობაზეც უარი უთხრეს.

მეილი, რომელშიც ბალენსიაგამ დემნას სტაჟირებაზე უარი უთხრა

მეილი, რომელშიც ბალენსიაგამ დემნას სტაჟირებაზე უარი უთხრა

"თქვენი აპლიკაცია გულდასმით განვიხილეთ და გადავწყვიტეთ, რომ ამჯერად თქვენს კანდიდატურაზე არჩევანი არ შევაჩეროთ," — ვკითხულობთ წერილში

ფოტო: Balenciaga

დემნას მიერ ბალენსიაგას გარდაქმნისა და მისი შემოქმედებითი ღვაწლის პატივსაცემად Kering-ის, მოდის სახლის მფლობელი კომპანიის, სათავო ოფისში გამოფენა გაიხსნა. "ვფიქრობ, რომ ეს ათი წელი ჩემთვის საზღვრების მოშლის გზა იყო. "როგორ შეგვიძლია მოდის აღქმა სხვანაირად, განსაკუთრებით ფუფუნების კონტექსტში?" — ამბობს დემნა.

დემნასთვის მიძღვნილი გამოფენა

დემნასთვის მიძღვნილი გამოფენა

ფოტო: Balenciaga

გამოფენის პირველი ექსპონატი ბალენსიაგას მიერ დემნასთვის სტაჟიორობაზე უარის თქმის ამსახველი მეილია. მაშინ, 2007 წელს, დემნას ახალი დამთავრებული ჰქონდა მსოფლიოს ერთ-ერთი ყველაზე პრესტიჟული მოდის უნივერსიტეტი, ანტვერპის აკადემია. "კაცის ტანსაცმლის ხაზის სტაჟიორობა მსურდა, ინტერვიუ ჩამიტარეს და საბედნიეროდ, უარი მითხრეს," — უყვება დემნა Vogue-ს.

"საბედნიეროდ?" — უკვირს ჟურნალისტს.

"რა თქმა უნდა! იმიტომ, რომ ჩემი პროფესიული გზა სრულიად განსხვავებულად წარიმართებოდა, სტაჟირებაზე რომ ავეყვანე," — ამბობს დემნა.

დემნასთვის მიძღვნილი გამოფენა

დემნასთვის მიძღვნილი გამოფენა

ფოტო: Balenciaga

დემნა გვასალია ბოლო ათწლეულის ერთ-ერთი ყველაზე გავლენიანი და თამამი ფიგურაა მოდის ინდუსტრიაში. მან ბალენსიაგა გადაიქცია არა უბრალოდ ბრენდად, არამედ პლატფორმად, რომელიც მუდმივად ეჭვქვეშ აყენებდა მოდის საზღვრებს, ესთეტიკას და თვით სისტემასაც კი. მისი დიზაინი არასდროს იყო მხოლოდ ტანსაცმელი — ეს იყო კომენტარი სამყაროზე, კულტურასა და პირად იდენტობაზე.

დღეს, ათწლეულის შემდეგ, დემნას კარიერაში ახალი ფაზა იწყება — მინიმალიზმის, სიღრმისეული ხელოვნებისა და ნაკლები სიტყვების მოყვარული დიზაინერი სექტემბერში Gucci-სთვის შექმნილ პირველ კოლექციას წარადგენს. მან ბალენსიაგაში ათი წელი გაატარა, როგორც ავანგარდულმა ხელმძღვანელმა და ახლა მზად არის, განაგრძოს ეს გზა ახალი კუთხით, ახალი სივრციდან — თუმცა, ისევ იმავე სიმართლითა და თავხედური პირდაპირობით, რაც სხვებისგან ყოველთვის გამოარჩევდა.

ეს არ არის ფინალი, ეს არის გარდატეხის წერტილი — დემნასთვის და, შესაძლოა, მთელი მოდის სამყაროსთვის.